Azərbaycanın Füzuli rayonunun təbii sərvətləri ermənilər tərəfindən dağıdılmışdır
Bakı, 23 avqust (AZƏRTAC). Azərbaycanın Füzuli rayonunun 50 kəndinin Ermənistan silahlı qüvvələri tərəfindən işğalından 19 il keçir.
Rayonun Dövlətyarlı və Dilağar əhəngdaşı, Kürdmahmudlu gil, Quruçay qum-çınqıl qarışığı yataqları hazırda ermənilərin əlindədir. Özünəməxsus təbiəti olan Füzuli rayonunun ərazisində 200-1400 yaşlı 11 ədəd Şərq çinarı təbiət abidəsi kimi pasportlaşdırılmış və işğala qədər mühafizə olunmuşdur.
Ekologiya və Təbii Sərvətlər Nazirliyinin “İşğal olunmuş Azərbaycan ərazilərində ətraf mühitə və təbii sərvətlərə dağıdıcı təsiri müəyyənləşdirən (izləyən) operativ mərkəz”i işğaldan sonrakı dövrlərdə rayon ərazisində təbii sərvətlərin ermənilər tərəfindən dağıdılmasına dair bir sıra faktlar aşkarlamışdır.
Müəyyən edilmişdir ki, geniş meşə massivləri ilə örtülü olan Dövlətyarlı kəndindəki ağaclar, Yağlıvənd kəndində yolun sağ və sol tərəfindəki böyük yaşıllıqlar tamamilə qırılmışdır. Eyni zamanda, Qoçəhmədli kənd yolu boyunca ağaclar kütləvi şəkildə məhv edilmişdir.
Bundan başqa, 2006-2009-cu illər ərzində rayonun 35 min hektardan artıq ərazisi ermənilər tərəfindən yandırılmışdır.
Bölmənin digər xəbərləri
