İDMAN
AZƏRBAYCANIN İDMAN İCTİMAİYYƏTİ AFFA PREZİDENTİNİN İFTİRALARINI RƏDD EDİR
Bəzi kütləvi informasiya vasitələrində Azərbaycan Futbol Federasiyaları Assosiasiyasının (AFFA) prezidenti Fuad Musayevin Azərbaycan Respublikasının Prezidenti Heydər Əliyevə ünvanlanmış məktubu dərc olunmuşdur. Həmin məktubda federasiyanın prezidenti son dövrdə Azərbaycan futbolunun acınacaqlı vəziyyətə düşməsində ölkədə bu idman növünün inkişafı üçün bilavasitə məsuliyyət daşıyan AFFA-nın fəaliyyətinə, əslində, fəaliyyətsizliyinə haqq qazandırmaqdan ötrü hər cür uydurma, böhtan və iftiralara əl atır, qaraya ağ, ağa qara deməkdən çəkinmir, futbolla bağlı bütün uğursuzluqların təqsirini respublika rəhbərliyində, Milli Olimpiya Komitəsində, onun prezidenti İlham Əliyevdə, Gənclər, İdman və Turizm Nazirliyində görür. Amma hamıya aydındır ki, bu iddiaların heç bir əsası yoxdur.
AFFA prezidentinin məktubunu oxuyarkən ən çox təəssüf, daha doğrusu, hiddət doğuran odur ki, o, son dövrdə Azərbaycan idmanının və idmançılarının beynəlxalq miqyaslı uğurlarını, respublikamızda bədən tərbiyəsi və idmanın kütləviliyinin təmin edilməsi, müstəqil Azərbaycanın gələcəyi olan bugünkü yeniyetmələrin və gənclərin əqli və fiziki cəhətdən sağlam böyümələri üçün görülən çox böyük işləri, MOK-un prezidenti İlham Əliyevin bu sahədəki şəxsi xidmətlərini, yumşaq desək, urvatdan, gözdən salmağa, daha doğrusu, açıq-aşkar inkar etməyə cəhd göstərir. Halbuki, idmanın inkişafı, o cümlədən ən yüksək standartlara uyğun gələn nəhəng komplekslərin bir-birinin ardınca tikilib istifadəyə verilməsi və bu işin indi də davam etməsi, Azərbaycanın sözün həqiqi mənasında idman ölkəsinə çevrilməsi, beynəlxalq idman təşkilatları rəhbərlərinin bunu dəfələrlə müxtəlif kürsülərdən bəyan etməsi təkzibedilməz həqiqətdir və bütün bu uğurları görməmək, onlardan xəbərdar olmamaq üçün, necə deyərlər, insan gərək kor və kar olsun.
Məhz buna görə də AFFA prezidentinin məktubu respublikamızın idman ictimaiyyətini haqlı olaraq hiddətləndirmişdir. Onlardan AZƏRTAC-a daxil olmuş etiraz məktublarının bir qismini oxuculara təqdim edirik.
X X X
AFFA prezidenti F.Musayevin Azərbaycan Respublikasının Prezidenti cənab Heydər Əliyevə ünvanladığı və “Novoye vremya” qəzetinin 2003-cü il 7 yanvar tarixli nömrəsində dərc edilmiş “Açıq məktub”unu oxuyanda çox təəccübləndik və bununla əlaqədar öz münasibətimizi bildirməyi qərara aldıq.
Sözün düzü, zənnimizcə, F.Musayev idmanı siyasətlə bağlamağa can atmaqla məsələni həddindən artıq siyasiləşdirir və dərindən səhv edir. Bəli, Azərbaycan Respubıikası Milli Məclisinin deputatı, Dövlət Neft Şirkətinin birinci vitse-prezidenti və Milli Olimpiya Komitəsinin prezidenti olaraq İlham Əliyev bu gün dövlət fəaliyyətini, siyasi və ictimai fəaliyyəti uğurla birləşdirir. Burada təəccüblü bir şey olmamalıdır, çünki dövlət xadimlərinin ictimai işləri də yerinə yetirdiyinə dair çoxlu misallar gətirmək olar. Bizə elə gəlir ki, bunun ancaq faydası və çox böyük köməyi ola bilər. Biz idmanda böyük və maraqlı yol keçmişik, müxtəlif idman rəhbərləri görmüşük və təbii olaraq, bizi, ilk növbədə, işin idman tərəfi maraqlandırır - çünki bütün həyatımız idmana bağlıdır.
Bəli, bu gün respublikamızda idman sahəsində hələ çox işlər görmək lazımdır. Mövcud idman qurğularını qaydaya salmaq, yenilərini tikmək, idman məktəblərinin işini sahmanlamaq, bir çox federasiyaların fəaliyyətini güclənidirmək və bir çox digər işlər görmək gərəkdir. Bütün bunlar hamıya məlumdur və bunu hansısa kəşv kimi qələmə vermək lazım deyildir.
Onu da bilmək lazımdır ki, bütün bu işlər xeyli vəsait və vaxt tələb edir. Eyni zamanda, daim yadda saxlamaq lazımdır ki, ölkədə çox böyük sayda qaçqınlar var və onların da daim qeydinə qalmaq gərəkdir.
Bildirmək istəyirik ki, ölkənin çox mühüm problemlərinin həlli ilə yanaşı, Azərbaycanda bədən tərbiyəsi və idmana da böyük diqqət yetirilir.
Məlum olduğu kimi, dövlət müstəqilliyinin bərpas edilməsi ilə Azərbaycanda olimpiya hərəkatının da təməli qoyulmuşdur. Ötən il respublika Milli Olimpiya Komitəsinin 10 yaşı tamam olmuşdur. Bu müddət ərzində müstəqil dövlət olaraq Azərbaycan olimpiya oyunlarında iki dəfə iştirak etdmişdir. MOK-un mövcudluğunun 10 ilindən 5 ili onun indiki prezidenti İlham Əliyevin rəhbərliyi dövrünə düşür və zənnimizcə, MOK-un prezidenti kimi o, öz vəzifələrinin öhdəsindən layiqincə gəlir. Ona görə də başa düşə bilmirik, MOK-un prezidenti İlham Əliyev nə pis iş görür ki, Fuad Musayev bununla razılaşa bilmir?
Müstəqil dövlət olaraq Azərbaycan olimpiya oyunlarında ilk dəfə 1996-cı ildə Atlantada iştirak etmişdir. O vaxt komandamız 23 nəfərdən ibarət idi. Həmin olimpiadada komandamız 177 ölkə arasında 61-ci yeri tutmuşdu. Komandamızın hesabında güləşçi N.Abdullayev qazandığı
cəmi bir gümüş medal vardı.
Azərbaycan ikinci dəfə 2000-ci ildə Sidney Olimpiadasında təmsil olunmuşdur və onda nümayəndə heyətimizə MOK-un indiki prezidenti İlham Əliyev başçılıq edirdi. Komandanın tərkibinə 31 idmançı daxil idi ki, bu da 1996-cı ildə keçirilmiş əvvəlki olimpiadada olduğundan 8 nəfər çoxdur. Azərbaycan 199 ölkə arasında 34-cü yeri tutmuşdur. Bu dəfə komandamız iki qızıl və bir bürünc medal qazanmışdır.
Qeyd etmək lazımdır ki, Azərbaycan MOK qazanılmış nailiyyətlə kifayətlənmədi, əksinə, öz fəaliyyətini daha da gücləndirdi. Maddi-texniki baza nəzərə çarpacaq dərəcədə möhkəmlənməyə başladı, Bakı, Naxçıvan, Gəncə, Şəki və Bərdədə yeni idman mərkəzləri tikildi, Quba, Lənkəran və Şamaxıda isə yeni qurğuların tikintisinə başlanmışdır. Daha yaxşı hazırlıq keçmək məqsədi ilə idmançılarımız digər ölkələrin ən yaxşı idman bazalarına təlim-məşq toplatılarına gedirlər.
Azərbaycan bir çox beynəlxalq yarışların keçirildiyi yerə çevrilmişdir. Məsələn, son beş ildə Bakıda yeniyetmələr və gənclər arasında boks üzrə Avropa və dünya çempionatları, bodibildinq üzrə Avropa çempionatı, qadınlar arasında voleybol üzrə Avropa Top-komanda kuboku və həndbol üzrə “Çağırış kuboku” yarışlarının final oyunları keçirilmişdir. Hər iki kuboku Azərbaycan voleybolçu və həndbolçuları qazanmışlar. 2002-ci ildə Bakıda gənclər arasında güləş və şahmat üzrə Avropa çempionatları keçirilmişdir və idmançılarımız bu yarışlarda da yaxşı nəticələr göstərmişlər. Göründüyü kimi, son beş ildə Azərbaycanda idman xeyli irəliləmişdir və bununla razılaşmamaq olmaz, çünki faktlar göz qabağındadır. Əgər 1997-ci ildə Azərbaycan itdmançıları müxtəlif yarışlarda cəmi 136 medal qazanmışdılarsa, 2002-ci ildə 175 medala layiq görülmüşlər. Onu da demək lazımdır ki, komandalarımızın və idmançılarımızın uğurlu çıxışları sayəsində yarışlara getdikcə daha çox azarkeş gəlməyə başlamışdır.
Ölkəmizdə beynəlxalq yarışlarla yanaşı, Respublika gənclər oyunlarının (2002-ci ildə sayca 3-cü), habelə ölkə çempionatlarının və müxtəlif turnirlərin keçirilməsi də ənənəyə çevrilmişdir.
Həndbolçular olaraq, Həndbol Federasiyasının fəaliyyətindən də danışmaya bilmərik. Federasiyanın işi çox qısa müddətdə canlandırılmışdır. Məlumdur ki, 1995-96-cı illərdə bir çox aparıcı qadın həndbolçuların getməsi ilə əlaqədar ölkəmizdə idmanın bu növünün səviyyəsi kəskin surətdə aşağı düşmüşdür və həndbolçularımız dünya miqyasında qazandıqları mövqelərini əldən vermişlər. Lakin federasiya rəhbərliyinin gücləndirilməsi nəticəsində bu prosesi dayandırmaq mümkün olmuşdur və indi normal səmərəli iş gedir. Respublikada peşəkar həndbol klubları yaradılmağa başlamışdır. İndi biz bir çox rəsmi yarışlarda və turnirlərdə müntəzəm çıxış edirik və gənclərimiz təcrübə toplayırlar. İnanırıq ki, Azərbaycan həndbolu keçmiş ənənələrini yaxın vaxtlarda bərpa edəcəkdir. Hazırda federasiyanın qüvvəsi ilə Bakıda həndbolçular üçün yeni idman kompleksinin tikintisinə başlanmışdır.
Belə bir fakti da qeyd etməmək olmaz ki, yüksək nəticələr göstərmiş və Azərbaycan idmanının inkişafına töhfə vermiş idmancılara və məşqçilərə dövlət qayğısı xeyli yaxşılaşmışdır. Dövlət mükafatlarına layiq görülənlər arasında idman nümayəndələrinin də olması normal hala çevrilmişdir. Respublika Prezidenti Heydər Əliyev idmançılarımızın 2000-ci il Sidney Olimpiya oyunlarında iştirakına yekun vurarkən və Azərbaycan Milli Olimpiya Komitəsinin 10 illik yubileyi münasibətilə şənliklərdə bu, xüsusilə nəzərə çarpırdı. Bir çox idmançılara və məşqçilərə dövlət mükafatları, pul mükafatları, mənzillərin açarları təqdim edilmiş və təqaüd təyin olunmuşdur.
Əminik ki, respublikada görülən bütün bu işlər idman naminə, gələcək nəslimiz naminə, doğma, müstəqil Azərbaycanımızın tərəqqisi naminə görülür.
Rəfiqə Şabanova
Azərbaycan MOK İcraiyyə Komitəsinin üzvü
Lyudmila Şubina
Azərbaycan MOK-un üzvü