Xəbər verdiyimiz kimi, bəzi kütləvi informasiya vasitələrində Azərbaycan Futbol Federasiyaları Assosiasiyasının (AFFA) prezidenti Fuad Musayevin Azərbaycan Respublikasının Prezidenti Heydər Əliyevə ünvanlanmış məktubu dərc edilmişdir. Bu, ölkənin idman ictimaiyyəti tərəfindən hiddətlə, kəskin etirazla qarşılanmışdır. Ayrı-ayrı təşkilatlardan, tanınmış idmançılardan və məşqçilərdən AZƏRTAC-a bu barədə müraciətlər, bəyanatlar daxil olmaqdadır. Onların bəzilərini oxuculara təqdim edirik. 

Hörmətli həmvətənlər!

Ölkəmiz müstəqillik qazanandan sonra ictimai, siyasi, sosial, iqtisadi, mədəni həyatımızda baş verən müsbət dəyişikliklər hamımıza məlumdur. O da məlumdur ki, bu dəyişikliklərin hamısının təməli müdrik siyasətçi, möhtərəm Prezidentimiz Heydər Əliyevin ölkəmizə rəhbərliyi dövründə qoyulmuşdur. Bizim Milli Paralimpiya Komitəsi də məhz bu dövrdə - 1996-cı il fevralın 9-da yaradılmışdır. Həmin dövrdə ölkəmizdə paralimpiya hərəkatı ancaq dövlətin müvafiq nazirliklərinin - gənclər və idman, əmək və əhalinin sosial müdafiəsi nazirliklərinin qayğısı ilə əhatə olunmuşdu. Milli Olimpiya Komitəsinin həmin dövrdəki rəhbərliyi ilə işgüzar əlaqələr yaratmaq cəhdlərimiz isə laqeydliklə qarşılanırdı. Milli Olimpiya Komitəsi ilə nəinki bizim, eyni zamanda ayrı-ayrı növlər üzrə idman federasiyalarının, Gənclər və İdman Nazirliyinin də əlaqə yaratmaq cəhdləri etinasızlıqla qarşılanırdı. Olimpiya hərəkatı özünün durğunluq dövrünü yaşayırdı.

İdmanla bağlı əsaslı müsbət dəyişikliklər ölkənin bütün idman ictimaiyyətinin yekdilliklə səs verərək, Milli Olimpiya Komitəsinə rəhbər seçdiyi İlham Əliyevin 1997-ci ildən indiyədək həyata keçirdiyi məqsədyönlü tədbirlər nəticəsində mümkün olmuşdur. Bilavasitə onun təşkilatçılıq işi sayəsində Milli Olimpiya Komitəsi özünün əsl funksiyasını yerinə yetirməyə başladı. Ayrı-ayrı idman federasiyalarının dövlətin müvafiq idman strukturu olan Gənclər və İdman Nazirliyi ilə əlaqələri bərpa edildi və nəhayət, Milli Olimpiya Komitəsi ölkənin bütün idman həyatının, sözün əsl mənasında, canlı əlaqələndiricisinə çevrildi. Həmin dövrdə yaranan əlverişli şəraitdən bəhrələnən idman qurumlarından biri də Milli Paralimpiya Komitəsi oldu. Milli Olimpiya Komitəsinin, əlaqədar idman federasiyalarının, Gənclər, İdman və Turizm Nazirliyinin, digər idman təşkilatlarının vahid bir mexanizm kimi fəaliyyəti qısa müddətdə öz müsbət nəticələrini verdi.

Artıq Azərbaycan dünyada nüfuzlu idman ölkəsinə çevrilmişdir. Hamımızın gözləri qarşısında fərdi idman növləri ilə yanaşı, komanda idman növlərində də böyük irəliləyişlər əldə olunmuşdur. Ölkəmizdə müxtəlif beynəlxalq yarışlar, hətta olimpiya oyunlarına lisenziya verən nüfuzlu turnirlər keçirilir. İdmançılarımızın uğurları, əgər belə demək mümkündürsə, həndəsi silsilə ilə artır. Olimpiya idman növləri ilə yanaşı, paralimpiya idman növləri də sürətlə inkişaf edir. Bütün bu uğurlar, ilk növbədə, Milli Olimpiya Komitəsinin prezidenti İlham Əliyevin xidmətidir. Hazırda dövlətin müvafiq strukturlarının, Milli Olimpiya Komitəsinin və idman federasiyalarının əlaqələri daha da möhkəmlənərək, bütün qüvvələr böyük vəzifələrin yerinə yetirilməsinə, Afina Olimpiya və Paralimpiya Oyunlarında uğurlar qazanılması işinə səfərbər edilmişdir.

Azərbaycanda futbol idmanın yeganə sahəsidir ki, mənfi dəyişikliklərə məruz qalaraq geriyə getmişdir. AFFA rəhbərliyi özünün bu fəaliyyətsizliyini müxtəlif bəhanələrlə ört-basdır etməyə çalışır, hətta son vaxtlar ölkə futbolunun inkişaf etdiyini və bunun üçün çoxlu işlər görüldüyünü bəyan edir.

Görəsən bu adamlar doğrudanmı hesab edirlər ki, Azərbaycan ictimaiyyəti ağı qaradan seçə bilmir. Onlar büsbütün yanılırlar və hətta heç nəyə yaramadıqları halda, bəzən hədlərini aşıb bəyanatlar verir, müraciətlər qəbul edirlər. Ölkə rəhbərliyinin, Milli Olimpiya Komitəsinin Gənclər, İdman və Turizm Nazirliyinin gördükləri böyük işlərə ləkə yaxmaq istəyirlər. Özləri Azərbaycanın bütün futbolsevərlərinə qarşı kobud davrandıqları, xalqımızı gözəl futbola həsrət qoyduqları bəs deyilmiş kimi, bu vəziyyətdən necə çıxmaq yollarını göstərən təcrübəli, təşəbbüskar və səriştəli insanların işlərini də heçə endirməyə, bütün Azərbaycan ictimaiyyətinə meydan oxumağa cəhd edirlər.

Azərbaycan futbolunun indiki vəziyyəti həqiqətən dözülməzdir. Biz bu vəziyyətdən çıxış yolunu ölkəmizdə futbolun, sözün əsl mənasında, ictimai əsaslarla idarə olunmasında, bu işdə ictimaiyyətin rəyinin nəzərə alınmasında görürük. Başa düşmək olmur ki, görəsən FİFA və UEFA nə vaxtdan Azərbaycan xalqının və onun futbolunun qarantına çevrilib? Əgər bu beynəlxalq təşkilatları Azərbaycan futbolunun taleyi az da olsa maraqlandırsaydı, ona qarşı belə ciddi sanksiyalar tətbiq etməzdilər.

İctimaiyyətin rəyi isə birmənalıdır: səlahiyyət müddəti qurtarmış AFFA rəhbərliyi istefa verməli, yeni, demokratik seçkilər keçirməli və futbol Azərbaycanın vahid idman həyatının bir qolu kimi inkişaf etməlidir.

Əgər AFFA rəhbərləri fikirləşirlərsə ki bu, onların və beynəlxalq komitələrin işidir, onda onlar çox dərindən yanılırlar. Azərbaycanda fəaliyyət göstərən hər bir təşkilat Azərbaycan xalqının mənafeyinə xidmət etməli və onun maraqlarını qorumalıdır. Belə olmayan təqdirdə, bu təşkilatın kimin üçün işlədiyi ictimai komissiya tərəfindən müəyyən edilməli və lazımi tədbirlər görülməlidir. Vaxt gözləmir.

Sonda bir daha ölkə ictimaiyyətinin bu məsələnin qısa müddətdə həllində əsas qüvvə olacağına və yaxın gələcəkdə Azərbaycan futbolunda da müsbət dəyişikliklərin təməlinin qoyulacağına əmin olduğumuzu bildiririk.

Müraciət Milli Paralimpiya Komitəsi

İcraiyyə Komitəsinin 2003-cü il

yanvarın 11-də keçirilmiş iclasında

qəbul edilmişdir.

X X X

Biz - bugünkü mitinqin iştirakçıları AFFA-nın prezidenti Fuad Musayevin Azərbaycanda idmanın inkişafı ilə bağlı qeyri-səmimi, həqiqətdən uzaq bəyanat və çıxışlarını, o cümlədən bununla əlaqədar mətbuat səhifələrində dərc olunan yazıları və televiziya verilişlərini həyəcanla izləyirik.

Qeyd etməyi lazım bilirik ki, son illərdə Azərbaycan Respublikası Milli Olimpiya Komitəsinin rəhbərliyi altında, şəxsən Komitənin prezidenti cənab İlham Əliyevin gərgin əməyi və səyləri nəticəsində respublikamızda idmanın bütün sahələrində böyük uğurlar qazanılır. Azərbaycan idmançılarının beynəlxalq yarışlarda, olimpiya oyunlarında, dünya və Avropa birinciliklərində əldə etdikləri nailiyyətlər, respublikamızın bir sıra şəhər və rayonlarında müasir tələblərə cavab verən idman bazalarının yaradılması bizi hədsiz sevindirir və idmana olan marağımızı daha da artırır. İdmana göstərilən böyük diqqət və qayğı üçün bugünkü mitinqin iştirakçıları və rayonun bütün gəncləri adından Milli Olimpiya Komitəsinin Prezidenti cənab İlham Əliyevə dərin minnətdarlığımızı bildiririk.

Respublikamız, o cümlədən idmanımız çox böyük inkişaf yolunda olduğu bir dövrdə, çox təəssüf ki, AFFA prezidenti Fuad Musayevin təqsiri üzündən gənclərimizin ən sevimli idman növlərindən biri olan futbolun inkişaf etdirilməsində acınacaqlı vəziyyət yaranmış, Azərbaycan futbolu nəinki özünün keçmiş nüfuzunu qoruyub saxlaya bilməmiş, əksinə, məhv olmaq həddinə çatdırılmışdır.

Fuad Musayevin ölkə futboluna vurduğu zərbə hamıya, o cümlədən beynəlxalq dairələrə də bəllidir. O, müxalifət qəzetlərindəki reklam xarakterli çıxışları ilə öz eyiblərini ört-basdır etmək naminə hamıya qara yaxmağa, Milli Olimpiya Komitəsinə, Gənclər, İdman və Turizm Nazirliyinə böhtanlar atmağa çalışır. Son vaxtlar Fuad Musayevin bəzi müxalifət partiyalarının başçıları ilə görüşlər təşkil etməklə ölkədəki ictimai-siyasi vəziyyəti müzakirə etməsi onun kimə və nəyə xidmət etdiyini açıq-aşkar sübut edir. Fuad Musayev nə qədər çalışsa da, Milli Olimpiya Komitəsinin, ümumiyyətlə, Azərbaycan idmanının İlham Əliyevin rəhbərliyi dövründə əldə etdiyi uğurların üzərinə kölgə sala bilməz.

Azərbaycan Respublikasının hörmətli Prezidenti Heydər Əliyevin idmanın inkişafına, ölkəmizin mötəbər beynəlxalq yarışlarda təmsil olunmasına xüsusi diqqəti göz qabağındadır. Dövlət rəhbərinin gənclər siyasətinin tərkib hissəsi olan bu məsələyə xüsusi əhəmiyyət verməsinin Azərbaycan idmanının nüfuzunun yüksəldilməsində müstəsna rolu vardır. Bunu beynəlxalq idman ictimaiyyəti də layiqincə qiymətləndirir.

Biz - İsmayıllı gəncləri AFFA-nın prezidenti Fuad Musayevin hərəkətlərini, böhtan və iftira xarakterli çıxışlarını, ölkədə idmanın inkişafı sahəsində əldə olunan müvəffəqiyyətlərə kölgə salmaq cəhdlərini qətiyyətlə pisləyir və rədd edirik.

Biz, bugünkü mitinqin iştirakçıları Azərbaycan futbolunda yaranmış böhranlı vəziyyəti, anarxiya, özbaşınalıq hallarını, qeyri-sağlam mühiti aradan qaldırmaq və ölkəmizdə futbolun gələcək inkişafı naminə AFFA-nın prezidenti Fuad Musayevin tutduğu vəzifədən istefa verməsini qətiyyətlə tələb edirik.

Müraciət İsmayıllı rayonu idman

İctimaiyyəti nümayəndələrinin

2003-cü il yanvarın 11-də keçirilmiş

mitinqində qəbul edilmişdir