AZƏRBAYCANIN İKİ GÜLƏŞÇİSİ YUNAN-ROMA GÜLƏŞİ ÜZRƏ AVROPA ÇEMPİONATINA QƏLƏBƏ İLƏ BAŞLAMIŞLAR
Bakı, 4 aprel (AZƏRTAC). Aprelin 4-də Vilnüsdə yunan-Roma güləşi üzrə Avropa çempionatı start götürmüşdür. Yarışın ilk günü döşək üzərinə çıxan Elvin Mürsəliyev (74 kq) və Fərid Mansurov (66 kq) ilk görüşlərində qələbə qazanmışlar.
E. Mürsəliyev onaltıdabir finalda polşalı Kşiştof Kovalskini məğlub etmişdir. Növbəti mərhələdə onun rəqibi Macarıstan idmançısı Peter Basçi olacaqdır.
Afina Olimpiadasının qalibi Fərid Mansurov isə Türkiyə təmsilçisi Rafiq Ayvazoğlunu üstələyərək səkkizdəbir finala vəsiqə qazanmışdır. Bu mərhələdə o, Plamen Petrov (Bolqarstan) ilə qarşılaşacaq.
Bu gün döşək üzərinə Azərbaycanın daha 2 idmançısı - Rövşən Bayramov (55 kq) və Fuad Əliyev (60 kq) çıxacaqlar.
Bölmənin digər xəbərləri
