Azərbaycanın kişi cüdoçuları Olimpiadada ilk dəfə tam heyətlə təmsil olunacaqlar
Bakı, 24 iyun, AZƏRTAC
Beynəlxalq Cüdo Federasiyası Tokio Yay Olimpiya Oyunlarına vəsiqə qazanan idmançıların siyahısını açıqlayıb.
AZƏRTAC xəbər verir ki, Olimpiya reytinqinə əsasən müəyyənləşən vəsiqələrə 110 ölkənin cüdoçuları sahib olublar. Onlar arasında Azərbaycan millisinin 12 üzvü də var. Cüdo tariximizdə ilk dəfə olaraq kişilərdən ibarət milli komandamızın Olimpiya Oyunlarına tam heyətlə yollanacağı rəsmiləşib. Cüdoçularımızdan Kəramət Hüseynov (60 kq), Orxan Səfərov, Nicat Şıxəlizadə (hər ikisi 66 kq), Rüstəm Orucov, Hidayət Heydərov (hər ikisi 73 kq), Murad Fətiyev (81 kq), Məmmədəli Mehdiyev (90 kq), Zelim Kotsoyev, Elmar Qasımov (hər ikisi 100 kq) və Uşanqi Kokauri (100 kq-dan yuxarı) lisenziyalara sahib çıxıblar.
Olimpiya Oyunlarında ölkəni hər çəki dərəcəsində bir idmançı təmsil edə bilər. Tokioya yollanacaq kişi cüdoçularımızın siyahısı yaxın günlərdə milli komandanın məşqçi heyəti tərəfindən açıqlanacaq.
Qadınlardan ibarət millimizin heyətində isə Aişə Qurbanlı (48 kq) və İrina Kindzerska (78 kq-dan yuxarı) “Tokio-2020”də iştirak hüququna yiyələniblər.
Bölmənin digər xəbərləri
