Azərbaycanın Moskvadakı səfirliyində Anım Gününə həsr edilmiş tədbir keçirilib
Moskva, 28 sentyabr, AZƏRTAC
Azərbaycanın Moskvadakı səfirliyində Anım Gününə həsr edilmiş tədbir keçirilib.
AZƏRTAC xəbər verir ki, tədbirdə Pakistanın Moskvadakı səfiri Şəfqət Əli Xan, Pakistan və Türkiyə səfirliklərinin əməkdaşları, Rusiya ictimaiyyətinin, Azərbaycan diasporunun, Heydər Əliyev Fondunun Rusiya Federasiyasındakı nümayəndəliyinin təmsilçiləri və başqaları iştirak ediblər.
Əvvəlcə Anım Günü münasibətilə Ali Baş Komandan, Prezident İlham Əliyevin Azərbaycan xalqına müraciəti nümayiş etdirilib. Gecənin iştirakçıları şəhidlərin xatirəsini bir dəqiqəlik sükutla yad ediblər.
Azərbaycanın Rusiyadakı səfiri Polad Bülbüloğlu tədbirdə iştirak edənlərə, Pakistanın Rusiya Federasiyasındakı səfiri Şəfqət Əli Xana, Pakistan və Türkiyə səfirliklərinin diplomatlarına İkinci Qarabağ müharibəsində bu ölkələr tərəfindən Azərbaycanın haqq işinin dəstəklənməsinə görə təşəkkürünü bildirib.
Polad Bülbüloğlu qeyd edib ki, 2020-ci il sentyabrın 27-si azadlıq uğrunda əks-hücum əməliyyatının -44 gün davam etmiş və Azərbaycan Ordusunun parlaq qələbəsi ilə başa çatmış əməliyyatın başlandığı gün kimi tarixə düşüb. Diplomat deyib: “Ötən 30 ildə Azərbaycanda sözdə deyil, əməldə canlarından keçməyə hazır olan vətənpərvər gənclərin gözəl nəsli yetişib”.
Səfir qeyd edib ki, Azərbaycan dövləti Qarabağ münaqişəsinin dinc yolla nizamlanması üçün nə mümkündürsə edib, illər boyu danışıqlar aparılıb, müxtəlif təkliflər müzakirə olunub, lakin erməni tərəfi münaqişənin sülh yolu ilə başa çatmasına gətirib çıxara biləcək bütün ağlabatan təkliflərdən israrla imtina edib.
P.Bülbüloğlu vurğulayıb ki, hazırda işğaldan azad edilmiş torpaqlarda bərpa işləri aparılır. Diplomat deyib: “Mən Şuşada atamın evini bərpa etmişəm. Hər dəfə Şuşaya gələndə qəlbimdə təsvirəgəlməz qürur hissi, öz xalqımın, öz ordumuzun, öz Prezidentimizin gücünə inam hissi oyanır. Qarabağdakı şəhərlərimiz və kəndlərimiz intensiv şəkildə bərpa olunur. Viran edilmiş Füzulidə səkkiz ay ərzində beynəlxalq aeroport tikilib. Tikinti məsələləri ilə yaxşı tanış olan bir moskvalı mühəndis bu yaxınlarda dedi ki, bu, sadəcə inanılmazdır. Hətta aeroportun layihəsinin hazırlanmasına il yarım - iki il vaxt lazımdır. Səkkiz ay ərzində beynəlxalq aeroport tikilməsi Azərbaycanın və əlbəttə, bizim Prezident İlham Əliyevin nailiyyətidir”.
“Kinolestnitsa” yaradıcılıq birliyinin baş prodüseri Yelena Tverdoxleb AZƏRTAC-ın müxbiri ilə söhbətində qeyd edib ki, bu gün bütün mütərəqqi bəşəriyyət Vətən müharibəsində öz torpağı uğrunda, öz böyük vətəni Azərbaycan uğrunda həlak olmuş qəhrəmanların xatirəsi qarşısında baş əyir.
Y.Tverdoxleb deyib: “Bu qəhrəmanlar öz torpaqlarını azad edib, öz xalqını müdafiə ediblər. Yekunda Azərbaycan öz ərazi bütövlüyünü bərpa edib və BMT Təhlükəsizlik Şurasının qətnamələrini yerinə yetirib. Bu günlərdə baş verən hadisələr qəlbimizdə həmişəlik qalacaq. Azadlıq uğrunda Vətən müharibəsinin başlanmasının ildönümü ilə əlaqədar, Azərbaycan Respublikasının Prezidenti İlham Əliyevə və onun şəxsində bütün Azərbaycan xalqına ən səmimi arzularımı bildirir, sülh, firavanlıq və rifah diləyirəm. Qəhrəmanların xatirəsi daim yaşayacaq!”
Tədbirdə Azərbaycan xalqının Qarabağın azad edilməsi uğrunda mübarizəsinə həsr olunmuş sənədli filmlər nümayiş etdirilib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
