Azərbaycanın pravoslav xristianları İsa Peyğəmbərin mübarək mövludu gününü – müqəddəs Milad bayramını qeyd edirlər
Bakı, 6 yanvar (AZƏRTAC). Bütün dünyanın pravoslav xristianları İsa Peyğəmbərin mübarək mövludu gününü - müqəddəs Milad bayramını qeyd edirlər. Kilsələrdə zənglər çalınır, dualar oxunur, Vifleyemdən gətirilmiş odla şamlar yandırılır.
Milad bayramı dindarlar üçün ən böyük bayramlardan biridir. Onlar Xilaskar İsanın mövludu gününü öz dinlərinin yarandığı gün hesab edirlər. Yeni tarix təqvimi də həmin gündən başlanır.
Milad günündə küsülülər bir-biri ilə barışmalı, xeyir işlər görməlidirlər. Bütün kilsələrdə gecə səhərəcən ibadət edilir. Dindarlar bu bayramı öz evlərində də qeyd edirlər. Səmada ilk ulduz görünəndə bayram süfrələri açılır. Bu süfrədə israfçılıq etmək məsləhət görülmür - meyvə və şirniyyatla kifayətlənmək lazımdır. İnsanlar bir-birinə elə hədiyyələr bağışlayırlar ki, bu müqəddəs bayram yadda qalsın.
İsa Peyğəmbərin mövludu ilə əlamətdar olan və bəşər sivilizasiyasında yeni bir tarixi mərhələnin əsasını qoyan Milad günü bütün dünyada olduğu kimi, Azərbaycanda da hər il pravoslav xristian icması tərəfindən təntənə ilə bayram edilir. Yeniliyin, əmin-amanlığın, mərhəmət və şəfqət duyğularının rəmzi olan bu bayramla əlaqədar yanvarın 6-dan 7-nə keçən gecə Azərbaycandakı bütün pravoslav kilsələrində dini ayinlər icra olunacaqdır.
Xristianlıq Azərbaycanda çox qədim tarixə malikdir. Təsadüfi deyil ki, Qafqazda ilk xristian məbədləri məhz Azərbaycanda təşəkkül tapmışdır. Səmavi dinlər burada əsrlər boyu dinc yanaşı fəaliyyət göstərərək, insanlar arasında dostluq və qardaşlıq münasibətlərinin yaranmasında misilsiz tarixi rol oynamışdır. Azərbaycanda heç vaxt milli-irqi ayrı-seçkilik, dini dözümsüzlük halları mövcud olmamışdır.
Nadir geosiyasi məkanda yerləşən Azərbaycanın tarixində və mədəniyyətində bütün dünya dinlərinin yüksək mənəvi dəyərləri əks olunmuşdur. Azərbaycanda tarixən formalaşmış tolerantlıq və dözümlülük cəmiyyətimizi səciyyələndirən gözəl ənənəyə çevrilmişdir.
Təməli ümummilli liderimiz Heydər Əliyev tərəfindən qoyulmuş dövlət-din münasibətləri konsepsiyasının uğurla həyata keçirilməsi nəticəsində bu ənənə daha da inkişaf edərək zənginləşmişdir.
Müstəqil Azərbaycan Respublikası bu gün də öz mütərəqqi ənənələrinə sadiqdir. Azərbaycanda ayrı-ayrı mədəniyyətlərin daşıyıcıları olan xalqlar və etnik azlıqlar həmişə sülh və əmin-amanlıq içində yaşamış, səmavi dinlər əsrlər boyu qarşılıqlı hörmət və etimad şəraitində fəaliyyət göstərmişlər. Ölkəmizdə etnik-mədəni müxtəlifliyin qorunub saxlanmasına və daha da inkişaf etdirilməsinə daim diqqət və qayğı göstərilir. Mütərəqqi milli-tarixi ənənələr üzərində bərqərar olmuş müasir cəmiyyətimizdə hökm sürən tolerantlıq, ictimai-siyasi sabitlik, vətəndaş həmrəyliyi Azərbaycan dövlətçiliyinin misilsiz nailiyyəti kimi qiymətləndirilir və xalqımız haqlı olaraq bununla fəxr edir.
Ölkə rəhbərliyi tərəfindən Azərbaycanda sülhün, əmin-amanlığın, vətəndaş həmrəyliyinin daha da möhkəmləndirilməsi və dilindən, dinindən, etnik mənsubiyyətindən asılı olmayaraq, hər bir vətəndaşın hüquq və azadlıqlarının təmin edilməsi istiqamətində səylər davam etdirilir.
Məmnuniyyət hissi ilə qeyd etmək lazımdır ki, ölkəmizin tam hüquqlu vətəndaşları olan pravoslav xristian icması öz dil və mədəniyyətini, dini etiqadını, adət-ənənələrini qoruyub saxlamaqla, milli-dini bayram və mərasimlərini azad və sərbəst şəkildə icra edir, Azərbaycanda gedən böyük quruculuq işlərində, dövlət müstəqilliyimizin daha da möhkəmləndirilməsində vətəndaşlıq borcunu layiqincə yerinə yetirir.
Prezident İlham Əliyev İsa Peyğəmbərin mübarək mövludu - müqəddəs Milad bayramı münasibətilə Azərbaycanın bütün xristian icmasını təbrik etmişdir.
Dövlətimizin başçısının təbrikində vurğulanmışdır ki, bu gün dünyada nümunəvi tolerantlıq örnəyi, sivilizasiyalararası və mədəniyyətlərarası dialoq məkanı kimi tanınan Azərbaycanda tarixən dinlər və etiqadlar əmin-amanlıq, qarşılıqlı hörmət və etimad şəraitində fəaliyyət göstərmiş, fərqli mədəniyyətlərin təmsilçiləri olan ayrı-ayrı xalqlar və etnik icmalar ümumi Vətən sevgisi, azərbaycançılıq məfkurəsi ətrafında sarsılmaz birlik və həmrəylik nümayiş etdirmişlər. Cəmiyyətimizdə etnik-mədəni müxtəlifliyin qorunub saxlanması, multikulturalizmin dəstəklənməsi və təşviq edilməsi müasir mərhələdə həyata keçirdiyimiz dövlət siyasətinin başlıca məqsədlərindən biridir. Azərbaycanın zəngin etno-mədəni palitrasında özünəməxsus yeri və rolu olan xristian icması, o cümlədən pravoslav etiqadlı həmvətənlərimiz ölkəmizdə gedən böyük quruculuq işlərində əsl vətəndaşlıq əzmi ilə yaxından iştirak edirlər.
Albina Atlıxanova
AZƏRTAC-ın müxbiri
Bölmənin digər xəbərləri
