AZƏRBAYCANIN ROMADAKI MÜVƏQQƏTİ İŞLƏR VƏKİLİ: İTALİYANIN AZƏRBAYCANLA ƏMƏKDAŞLIĞI GÜCLÜ İNKİŞAF DÖVRÜNÜ KEÇİRİR
O qeyd etmişdir ki, İtaliya Azərbaycanın, ilk növbədə, energetika sahəsində ən iri iqtisadi tərəfdaşlarından biridir.
Bayram Həsənov demişdir: “İtaliya Azərbaycandakı tərəfdaşları həmişə cəlb etmişdir. Biz italyan rəssamlarının, musiqiçilərinin, memarlarının, alimlərinin, ictimai və dövlət xadimlərinin dünya sivilizasiyasına töhfələrinə heyranıq. Biz bu ölkənin xalqına və tarixinə dərin ehtiram hissi bəsləyirik. İtaliya inkişaf etmiş iqtisadiyyata və yüksək mədəniyyətə malik dövlətdir”. Diplomatın sözlərinə görə, “Azərbaycanın İtaliya ilə münasibətləri möhkəmlətmək və genişləndirmək arzusu buna əsaslanır”.
Müvəqqəti işlər vəkili vurğulamışdır ki, “Azərbaycan və İtaliya cənub ölkələridir. İnsanların xarakterində, musiqidə, təbii şəraitdə, hətta milli kulinariyada və bir sıra digər sahələrdə oxşar cəhətlər olduqca çoxdur. Bütün bunlar əməkdaşlıq üçün yaxşı zəmin yaradır”.
İtaliya Azərbaycan Respublikasının müstəqilliyini ilk ölkələr sırasında, 1992-ci il yanvarın 1-də tanımışdır. Azərbaycan müstəqilliyini bərpa etdikdən sonra Roma ilə Bakı arasında qarşılıqlı fəaliyyət yeni inkişafını tapmışdır. Həmin dövrdə yüksək səviyyədə qarşılıqlı səfərlər və məsləhətləşmələr ikitərəfli münasibətlərin genişlənməsində çox böyük rol oynamışdır. Azərbaycan Prezidenti Heydər Əliyevin 1997-ci ilin sentyabrında İtaliyaya rəsmi səfəri bu sahədə əlamətdar mərhələ olmuşdur.
Bayram Həsənov xatırlatmışdır ki, 1994-cü ildə Azərbaycan özünün zəngin neft və qaz yataqlarının işlənilməsinin yeni mərhələsinə başlamışdır. Bu prosesdə İtaliya şirkətləri də iştirak edirlər. O demişdir: “Bizim belə düşünməyə əsasımız var ki, Azərbaycan-İtaliya işgüzar əməkdaşlığının daha da intensivləşməsi böyük perspektivlərə malikdir və bu, nəinki ölkələrimizin mənafelərinə cavab verəcək, həm də ümumavropa iqtisadi inteqrasiyasının inkişafına kömək edəcəkdir”.
