Azərbaycanın ŞƏT formatlarında iştirakı iqtisadi əməkdaşlıq üçün yeni imkanlar açır – ŞƏRH
Bakı, 31 avqust, AZƏRTAC
Azərbaycanın Şanxay Əməkdaşlıq Təşkilatının (ŞƏT) fəaliyyətində iştirakı həm ikitərəfli münasibətlərin, xüsusilə Qırğızıstanla əlaqələrin daha da inkişaf etdirilməsi, həm də Mərkəzi Asiya ölkələri ilə iqtisadi əlaqələrin genişləndirilməsi baxımından mühüm əhəmiyyət daşıyır.
Bu fikri AZƏRTAC-a UNEC-in İqtisadiyyat kafedrasının dosenti, iqtisadiyyat üzrə fəlsəfə doktoru Emin Qəribli deyib.
Onun sözlərinə görə, əsas istiqamətlərdən biri Azərbaycan–Qırğızıstan münasibətlərinin dərinləşdirilməsi, eləcə də qarşılıqlı iqtisadi əlaqələrin inkişaf etdirilməsi üçün ŞƏT-in çoxtərəfli platforma kimi imkanlarından istifadə olunmasıdır.
“ŞƏT Azərbaycan üçün mühüm əhəmiyyət daşıyan platformalardan biridir. Mərkəzi Asiya ölkələri ilə çoxsaylı layihələr həyata keçiririk və belə formatda iştirak region dövlətləri ilə iqtisadi əlaqələri daha da möhkəmləndirməyə imkan verir”, – deyə ekspert qeyd edib.
E.Qəribli vurğulayıb ki, ŞƏT çərçivəsində əməkdaşlıqda Orta Dəhlizin inkişafı da xüsusi əhəmiyyət daşıyır: “Orta Dəhlizə nəqliyyat qovşağı kimi baxsaq, onun başlanğıcı faktiki olaraq Çinlə bağlıdır. ŞƏT çərçivəsində mövcud nəqliyyat və logistika problemlərini müzakirə edə, eləcə də yaranan məsələlərin həlli yollarını birgə tapa bilərik. Genişləndirilmiş əməkdaşlıq formatı yalnız ikitərəfli məsələləri deyil, həm də aktual regional və qlobal problemləri müzakirə etməyə imkan verir. Təşkilatın tamhüquqlu üzvləri ilə yanaşı, müxtəlif formatlarda digər dövlətlər, o cümlədən Azərbaycan, Türkiyə, İran və Ermənistan da təmsil olunur. Belə genişləndirilmiş formatda mövcud problemləri və qarşıya qoyulan vəzifələri müzakirə etmək, birgə həll yolları tapmaq mümkündür”.
E.Qəribli, həmçinin Azərbaycanın müxtəlif sahələrdə Mərkəzi Asiya ölkələri ilə əməkdaşlığının böyük potensialına diqqət çəkib.
“Mərkəzi Asiya ölkələri ilə kənd təsərrüfatı, yaşıl enerji və ənənəvi enerji kimi sahələrdə ümumi maraqlarımız formalaşıb. Bu istiqamətlərin Bişkek sammitinin gündəliyində də yer alması istisna deyil. Mühüm istiqamətlərdən biri Azərbaycanın ŞƏT-in fəaliyyətində iştirakını daha da genişləndirmək istəyidir. Təşkilatın tamhüquqlu üzvü olmaqda maraqlıyıq. Bu, ŞƏT-ə üzv ölkələrdən investisiyaların cəlb edilməsi, eləcə də yeni birgə layihələrin həyata keçirilməsi üçün imkanları genişləndirəcək”, – deyə o bildirib.
Ekspert qeyd edib ki, Azərbaycan mövqelərini möhkəmləndirməklə yanaşı, beynəlxalq və regional əməkdaşlıq formatlarında iştirak etməkdə maraqlıdır: “Bu gün dünya iqtisadiyyatında baş verən dəyişikliklər fonunda inteqrasiya proseslərini möhkəmləndirməyə imkan verən bütün mövcud platformalardan istifadə etmək lazımdır. Belə hər bir addım Azərbaycan, Qırğızıstan və regionun digər ölkələri arasında ticarət əlaqələrinin inkişafına töhfə verəcək. Ən başlıcası sənaye kooperasiyasının inkişaf etdirilməsi və investisiyaların cəlb olunmasıdır. Mərkəzi Asiya ölkələri ilə artıq ümumi sənaye maraqlarımız mövcuddur. Azərbaycanın tranzit imkanları ölkələrimiz arasında sənaye kooperasiyasının inkişafına kömək edə bilər. Bəzi dövlətlər üçün müvafiq istehsal bazası yaratmaq və bir-birini tamamlayan sahələri inkişaf etdirmək lazımdır”.
Bölmənin digər xəbərləri
