Azərbaycanlı ifaçı Tbilisidə tamaşaçıları heyran edib
Tbilisi, 8 may, AZƏRTAC
Gürcüstanın geniş oxucu kütləsinə malik kvirispalitra.ge portalında və eyniadlı qəzetdə Azərbaycanlı müğənni iki gözdən əlil Marneulidən olan 24 yaşlı Şaban Məmmədov haqqında məqalə dərc olunub.
AZƏRTAC xəbər verir ki, məqalədə Gürcüstanda hər il keçirilən “Xalxuri” (Xalq mahnıları) festivalında çıxış edən Şaban Məmmədovun gürcü dilində ifa etdiyi "Gecikmişdilər" mahnısının tamaşaçılar tərəfindən böyük sevinc və alqışlarlıa qarşılandığı qeyd olunur.
Məqalə müəllifi yazır: “Azərbaycanlı musiqiçinin gürcü dilində mahnısı gürcüləri ağlatdı. Hamlet Qonaşvilidən sonra bu mahnının belə ifa edildiyini eşitməmişdim. O səs haradan gəldi?! Nə möcüzədir...?".
Ş.Məmmədov müsahibəsində deyir: “Mən ifamın belə qarşılanacağını gözləmirdim. Mahnının belə uğur qazanmasında “Şəvnəbada” ansamblının böyük rolu oldu”.
Gürcü müğənnilərinə münasibətindən, hədəflərindən və planlarından geniş danışan S.Məmmədov deyib ki, valideynləri onu təhsil almaq üçün “Cəndəri” məktəbinə göndəriblər. Çox keçmədən məktəb direktoru valideynlərinə onu Tiflisdəki gözdən əlil və zəif görənlər üçün dövlət məktəbinə aparmağı tövsiyə etdi: “Orada təhsilimi aldım və gürcü dilini öyrəndim. Musiqi isə mənim həyatıma danışa bildiyimdən çox tez daxil oldu.
“Hələ 7 aylıq körpə uşaq olarkən həkimlərin səhlənkarlığı ucbatından məndə sepsis yarandı. İlk əməliyyatımı edəndə 9 aylıq idim və görmə qabiliyyətimi itirmişdim. Bundan sonra dünyanı eşitmə vasitəsilə dərk etməyə çalışdım. Mənim üçün hər şey musiqi idi. İnsanların danışığını, quşların cingiltili səsini, yarpaqların xışıltısını, küləyin, yağışın səsini, hər şeyi ürəyimlə dinləyib müşahidə edirdim, hər səsdə melodiya axtarırdım. Müəllimim mənə Hamlet Qonaşvilinin “Tibatvinin günəşi”ni dinləməyə tövsiyə edəndə birinci sinifdə oxuyurdum. O vaxtdan bəri tez-tez bu mahnını yuxuda eşidirəm. Daim belə bir melodiya eşitmək arzusunda idim. Oxumağı və yazmağı öyrənəndə onun haqqında bəzi məlumatlar öyrənməyə çalışdım”, – deyə Şaban Məmmədov vurğulayır.
Gənc ifaçı 6 yaşından oyuncaq klaviatura alətində melodiyalar bəstələməyə başlayıb. Valideynləri onda musiqiyə olan bu marağı görəndə deyiblər ki, əgər müğənniliklə məşğul olmaq istəsə, ona rəqəmsal piano alacaqlar və mükəmməl musiqiçi yanına aparacaqlar.
Sonra onu Marneuli Mədəniyyət Mərkəzində Amiran Naskidaşvilinin yanına aparıblar və ilk dəfə səhnəyə çıxmağı da onun sayəsində olub.
Gənc müğənni daha sonra Batumi Beynəlxalq Festivalının ən yüksək mükafatını – Qran-Prini qazanıb. Gənc ifaçı Şaban Məmmədov Çexiyanın Praqa şəhərində keçirilən “Praqa Milad Ulduzları 2023” 39-cu Beynəlxalq Xalq Rəqsləri və Musiqisi Müsabiqə-Festivalında Qran-Pri mükafatına layiq görülüb.
Ş.Məmmədov deyir: Qonaşvilinin bu mahnısını çoxları oxuyub, amma məndə Hamlet xəttinin əskik olduğunu hiss edirdim. Mən bu əskikliyi aradan götürmək, onun səsini bərpa etmək istəyirdim. Bu mahnının o qədər də melismatikası yoxdur. İfadan sonra eşidəndə ki, Hamlet Qonaşvilidən sonra heç kim bu mahnını belə ifa etməyib, çox sevindim və hətta nə edəcəyimi bilmədim. Məqsədim Hamlet Qonaşvilini mümkün qədər canlandırmaq idi. Musiqidə ideallaşdıra biləcəyim biri varsa, o da bu insandır”.
Ş.Məmmədov milli geyimləri çox sevir. Gürcü ədəbiyyatını və tarixini də yaxşı bilir.
Brayl əlifbası ilə mətnləri oxuyur, audiokitablara qulaq asır.
Jurnalist Xatuna Baxturidzenin “Şaban, dünyanı necə təsəvvür edirsən?” sualına da özünəməxsus şəkildə cavab verib.
“Mən dünyanı qara və ağ rəngdə görürəm. Mahnının rənginə gəldikdə isə onu deyə bilərəm ki, bəli, mahnı rəngarəngdir”.
Qeyd edək ki, məqalə Diasporla İş üzrə Dövlət Komitəsinin Tbilisidə fəaliyyət göstərən “Alyans” Gənclər Mərkəzinin “Azərbaycan həqiqətlərinin və mədəni irsinin Gürcüstanda təbliği” layihəsi çərçivəsində gürcü dilindən Azərbaycan dilinə tərcümə olunub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
