Azərbaycan Respublikasının Avropa Şurası yanındakı daimi nümayəndəliyindən AZƏRTAC-ın müxbirinə bildirmişlər ki, noyabrın 23-də Strasburqdakı beynəlxalq nümayəndəliklərdə çalışan əməkdaşların xanımlarının və qadın əməkdaşların üzv olduqları “Qadın dostluğu” təşkilatı AŞ-nin baş katibi Valter Şvimmerin təşəbbüsü ilə “Həmrəylik günü” adı altında xeyriyyə tədbiri keçirilmişdir. Cənab V.Şvimmerin də iştirak etdiyi tədbirdən məqsəd AŞ-nin üzvü olan ölkələrdə uşaq evlərinə və xəstəxanalarına yardım toplamaq idi. 

Xeyriyyə tədbirindən əvvəl bir neçə ölkəyə yardım barədə xüsusi layihələr hazırlanaraq “Qadın dostluğu” təşkilatına təqdim edilmişdi. Ölkəmizin diplomatik nümayəndəliyinin başçısının xanımı S.Mehdiyeva Saatlı rayonu ərazisində məskunlaşmış Füzuli və Cəbrayıl bölgələrindən olan 545 məcburi köçkün uşağın təhsil aldığı üç tədris ocağına məktəb ləvazimatının alınması üçün 2 min avro vəsait ayrılması təşəbbüsü ilə çıxış etmiş və adı çəkilən təşkilata bu barədə müvafiq layihə təqdim olunmuşdu.

Avropa Şurasının binasında tədbirlə bağlı stendlər düzəldilmişdi. Stendlərdə müxtəlif ölkələrdə, o cümlədən respublikamızda həyata keçiriləcək layihələr barədə məlumat, fotoşəkillər və Ermənistanın işğalı altında olan ərazilərimizin göstərildiyi xəritə asılmışdı.

Ölkəmizə aid bölmə nümayəndəliyin əməkdaşlarının xanımları, qadın əməkdaşları və Strasburqda yaşayan azərbaycanlı qadınlar tərəfindən milli musiqi alətləri, qədim xalçalar, müxtəlif adda kitab və broşürlərlə zənginləşdirilmiş, milli geyimli qızlar isə tədbir iştirakçılarını şirniyyata və çaya qonaq etmişdilər.

Xeyriyyə tədbirində gözlənildiyindən də artıq vəsait toplanmışdır. Təşkilatın rəyasət heyəti nəzərdə tutulmuş layihənin həyata keçirilməsi üçün ölkəmizə 6 min avro məbləğində yardım ayrılmasını qərara almışdır. Bu vəsait yaxın zamanlarda təşkilatın nümayəndələri tərəfindən təqdim olunacaqdır. Xatırladaq ki, Azərbaycan Cənubi Qafqazda bu təşkilatın yardım göstərdiyi yeganə ölkədir.

Əsgər Əliyev

AZƏRTAC-ın xüsusi müxbiri

Paris