Zaqatala, 15 dekabr, Mustafa Dadaşov, AZƏRTAC

“Azərtütün” ASC-nin 2021-ci ildə istehsal etdiyi quru tütünün hamısı Rusiya müəssisələrinə satılıb. Bağlanmış müqaviləyə əsasən, bu il də Rusiyaya quru tütün göndərilməsinə başlanılıb.

AZƏRTAC-ın bölgə müxbiri “Azərtütün” ASC-nin aqrar şöbəsinin müdiri Hüsamettin Koçhanla şirkətin Zaqatala rayonunun Aşağı Tala kəndində yerləşən tütün istehsalı və emalı məntəqəsində görüşüb, mövsüm ərzində görülən işlər, emal məntəqələrinin fəaliyyəti, yaş tütünün yığılması və qurudulması, quru tütün istehsalı, tütünün alış qiymətləri və digər məsələlərlə maraqlanıb.

Respublikamızda tütünçülüyün inkişafına öz töhfəsini verən “Azərtütün” Açıq Səhmdar Cəmiyyəti (ASC) tərəfindən builki mövsümdə şimal-qərb bölgəsinə daxil olan Balakən, Zaqatala, Qax, Şəki və Oğuz rayonlarında 587 hektar sahədə “Virciniya” növlü tütün əkilib. Səhmdar Cəmiyyətə məxsus tütün sahələrində yaş tütün yarpağının dərimi və qurudulması artıq başa çatıb.

ASC rəsmisi bildirib ki, builki mövsümdə tütün əkini ilə əlaqədar Balakən, Zaqatala, Qax, Şəki və Oğuz rayonlarında ümumilikdə 84 fermerlə müqavilə bağlanılıb. Şirkətin mütəxəssisləri əvvəlcə fermerlərin tütün əkmək istədikləri sahələrlə tanış olub, torpaqdan analiz nümunələri götürüb, təhlillər aparıb, tütün əkininə yararlı olan torpaq sahələrini müəyyənləşdiriblər. Yararsız torpaq sahələrində tütün əkilməsi fermerlərə məsləhət görülməyib. “PAŞA Bank” vasitəsilə tütünçü fermerlər çox aşağı faizli kreditlə təmin olunub. Fermerlərin 250-dək əkin sahəsinin torpaq analizlərinin bütün maliyyə xərclərini şirkət həll edib. Fermerlər torpaq analizlərinə görə heç bir xərc çəkməyiblər. Mövsüm vaxtı şirkətin aqronomları daim fermerlərin yanında olub, məsləhətlər veriblər. Tütünçü fermerlər üçün təlimlər təşkil edilib.

Şöbə müdirinin sözlərinə görə, cari mövsümdə sınaq məqsədilə Fransadan iki yeni tütün sortu gətirilərək sahələrə əkilib. ASC-nin sahələrində yetişdirilən “Virciniya” tütün növünün 70 faizi ABŞ, 30 faizi isə Fransadan gətirilən sortlardır. Yeni tütün sortları yerli iqlimə uyğundur. Nəticələr müsbətdir. Gələcəkdə də yeni, məhsuldar tütün sortlarının gətirilməsi nəzərdə tutulur.

Hüsamettin Koçhan bildirib ki, bu il “Azərtütün” ASC tərəfindən yaş tütünün tədarük qiymətləri xeyli artırılıb. Belə ki, 3-cü sort tütünün satış qiyməti 1 kiloqram üçün 10 qəpikdən 18 qəpiyə, 2-ci sort üçün 18 qəpikdən 25 qəpiyə, 1-ci sort üçün isə 27 qəpikdən 30 qəpiyə qaldırılıb.

Mövsüm ərzində ASC-nin Zaqatala, Qax və Şəki rayonlarında fəaliyyət göstərən tütün istehsalı və emalı məntəqələrinə fermerlərdən 4543 ton yaşıl tütün kütləsi daxil olub. O cümlədən Zaqatala məntəqəsi fermerlərdən 1095 ton, Qax məntəqəsi 1026 ton, Şəki məntəqəsi isə 2422 ton yaş tütün qəbul edib. Cari təsərrüfat ilində emal məntəqələrində ümumilikdə 760 ton quru tütün istehsal olunaraq anbarlara yığılıb.

“Azərtütün” ASC-nin rəsmisi Hüsamettin Koçhanın sözlərinə görə, şirkətin 2021-ci ildə istehsal etdiyi quru tütünün hamısı Rusiya Federasiyasının müəssisələrinə satılıb. Bu ilin məhsulunun da əsasən Rusiya şirkətlərinə satılması nəzərdə tutulur. Bağlanmış müqavilə əsasında artıq bu ölkəyə tütün göndərilməsinə başlanılıb.