“Sehrli xalçalar” xalça sərgisi bu dəfə İspaniyadadır

Bakı, 20 dekabr, AZƏRTAC

Azərbaycanın İspaniyadakı səfirliyi və “Azərxalça” ASC-nin birgə təşkilatçılığı, Azərbaycan Respublikasının İxracın və İnvestisiyaların Təşviqi Agentliyinin (AZPROMO) dəstəyilə İspaniya Kral Xalça Fabrikinin sərgi salonunda Azərbaycan xalçalarının sərgisi təşkil edilib.

“Azərxalça” ASC-dən AZƏRTAC-a bildirilib ki, tədbir mədəniyyət, təhsil və elm sahələrində ikitərəfli əməkdaşlığı ehtiva edən Azərbaycan və İspaniya arasında imzalanmış sazişə müvafiq olaraq, Azərbaycan xalqının Ümummilli Lideri Heydər Əliyevin anadan olmasının 100 illik yubileyinə həsr olunmuş silsilə tədbirlər çərçivəsində keçirilib.

“Sehrli xalçalar” sərgisinin açılışı ilə bağlı təşkil olunmuş xüsusi tədbirdə İspaniya dövlət qurumlarının rəsmiləri, parlamentin üzvləri, Madriddəki diplomatik korpusun nümayəndələri, səfirlər, KİV nümayəndələri, elm və akademik dairələrin təmsilçiləri, incəsənət və mədəniyyət xadimləri, habelə İspaniyada yaşayan Azərbaycan, türk və digər icmaların üzvləri iştirak edib.

Azərbaycanın İspaniyadakı səfiri Ramiz Həsənov tədbiri açaraq ölkəmizdə xalçaçılıq sənətinin qədim tarixə malik olduğunu, usta xalçaçıların bu sənətin incəliklərini gənc nəslə uğurla ötürdüyünü, ölkə rəhbərliyinin bu sənətin inkişafına mühüm əhəmiyyət verdiyini və “Azərxalça” ASC-nin xalçalarımızın təbliğatında gördüyü işləri xüsusi qeyd edib. Səfir, həmçinin “Azərxalça” ASC və İspaniya Kral Xalça Fabriki arasında əməkdaşlığı təşviq edən sazişin imzalanmasını iki ölkənin xalçaçılıq üzrə ixtisaslaşmış müvafiq qurumlarının gələcəkdə birgə fəaliyyətlərinin inkişafı üçün məxsusi əhəmiyyət daşıdığını bildirib.

“Azərxalça” ASC-nin İdarə Heyətinin sədri, Əməkdar incəsənət xadimi Emin Məmmədov isə çıxışı zamanı tədbir iştirakçılarını qarşıdan gələn Yeni il və Dünya Azərbaycanlılarının Həmrəyliyi Günü münasibətilə təbrik edərək təşkilatın tarixindən söz açıb. Sədr “Azərxalça” ASC-nin əsas məqsədinin xalçaçılıq ənənəsinin qorunub saxlanması və bu sənətin daha da inkişaf etdirilməsindən ibarət olduğunu söyləyib. O, Azərbaycan xalq tətbiqi sənəti və onun bir qolu olan xalçaçılığın xalqımızın milli mədəniyyəti tarixində özünəməxsus yer tutduğunu vurğulayıb. E.Məmmədov sərgidə nümayiş olunan, Qarabağ, Qazax, Naxçıvan, Şirvan xalçaçılıq məktəblərinə aid xalçalardan bəhs edib.

Daha sonra çıxış edən İspaniya Kral Xalça Fabrikinin baş direktoru Alexandro Kleker qədim tarixə malik Azərbaycan xalçalarının dünyada özünəməxsus ornament, kompozisiya və rəng çalarları ilə tanındığını və təmsil etdiyi qurumun “Azərxalça” ASC və səfirliklə birlikdə bu tədbirin təşkilindən məmnunluq duyduğunu bildirib. O, həmçinin “Azərxalça” ASC və İspaniya Kral Xalça Fabriki arasında praktiki əməkdaşlığa dair bu gün imzalanmış sazişin tarixi əhəmiyyət daşıdığını və sözügedən sənədin tərəflər arasında nümayəndə heyətlərinin qarşılıqlı səfərləri, həmçinin Azərbaycanda və İspaniyada birgə sərgilərin təşkili, qarşılıqlı məlumat və təcrübə mübadiləsinin aparılmasına böyük töhfələr verəcəyinə əmin olduğunu vurğulayıb.

Sərgi iştirakçıları daha sonra ləziz Azərbaycan təamları, yerli şərab nümunələrinin dadına baxıb, Əməkdar artist, tarzən Şəhriyar İmanov və ansamblının ifasından zövq alıblar.

Sərgi ziyarətçiləri üçün Azərbaycan xalçasının toxunma prosesi nümayiş olunub, ustad dərsləri keçilib. Sərgi iştirakçılarına xalçada öz ilmələrini atmaq imkanı yaradılıb. Azərbaycan xalçasının toxunma prosesində iştirak edən hər kəsə “Azərxalça” ASC-nin xüsusi sertifikatı da təqdim olunub.

Eyni zamanda, uşaqlar üçün nəfis tərtibatda və ingilis, ispan dillərində hazırlanmış Azərbaycanda xalçaçılıq sənətinə aid kitablar və broşürlər paylanılıb, xalçaçılıq sənəti və ölkəmizin tanınmış xalça toxucularından bəhs edən film nümayiş olunub.

İspaniya Kral Xalça Fabrikinin əsas qalereyasında nümayiş olunacaq sərgi 2024-cü il yanvarın 19-dək davam edəcək. Sərgi ziyarətçilərinə, həmçinin Azərbaycan xalçaçılıq sənəti və məktəbləri barədə məlumat veriləcək.

Xatırladaq ki, sərgidən öncə “Azərxalça” ASC və İspaniya Kral Xalça Fabriki arasında əməkdaşlığı təşviq edən, Azərbaycan və İspaniyanın xalçaçılıq üzrə ixtisaslaşmış müvafiq qurumlarının gələcəkdə birgə fəaliyyətlərinin inkişafı üçün məxsusi əhəmiyyət daşıyacaq saziş də imzalanıb.