AZPROMO: İnvestorlar etimad, proqnozlaşdırılabilən və risklərə qarşı effektiv müdafiə mexanizmləri tələb edirlər

17.06.2026 [13:13]
Çap et
A⁺ A^-

Bakı, 17 iyun, AZƏRTAC

Son on il ərzində əczaçılıq, tekstil, ağır və yüngül sənaye, maşınqayırma kimi hədəf sahələr üzrə ixtisaslaşmış bir sıra sənaye zonaları yaratmışıq. İqtisadiyyatın şaxələndirilməsi prosesini gücləndirmək və beynəlxalq logistikanı təşviq etmək məqsədilə Ələt Azad İqtisadi Zonasını fəal şəkildə inkişaf etdiririk.

AZƏRTAC xəbər verir ki, bunu İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev İslam İnkişaf Bankı Qrupunun 51-ci İllik Toplantıları çərçivəsində “İslam İnkişaf Bankı Qrupunun Özəl Sektor Forumu"nda çıxışı zamanı deyib.

Y.Abdullayev bildirib ki, Bakı Beynəlxalq Dəniz Ticarət Limanı artıq Xəzər regionunda əsas logistika qovşaqlarından birinə çevrilib.

“Bakı–Tbilisi–Qars dəmir yolu Asiya ilə Avropa arasında birbaşa dəmir yolu bağlantısı yaradaraq yükdaşımaların tranzit müddətini əhəmiyyətli dərəcədə azaldır. Azərbaycan Günəş və külək enerjisi üzrə böyük potensiala malikdir. Bu səbəbdən beynəlxalq tərəfdaşlarla birlikdə yalnız milli enerji təhlükəsizliyinə deyil, həm də regional enerji inteqrasiyasına töhfə verəcək irihəcmli yaşıl enerji layihələri həyata keçiririk. İnformasiya və kommunikasiya texnologiyaları iqtisadi transformasiyanın getdikcə daha vacib elementi olur. Bilik əsaslı iqtisadiyyatın inkişafını dəstəkləmək məqsədilə rəqəmsal infrastruktura, innovasiya ekosistemlərinə və insan kapitalına investisiyalar yatırırıq. Reallıq göstərir ki, təkcə fiziki infrastruktur kifayət etmir. Tənzimləyici fərqlər, maliyyəyə məhdud çıxış imkanları, maliyyə institutlarında institusional potensial çatışmazlıqları və ticarətin asanlaşdırılması sahəsində mövcud boşluqlar regionlarımız arasında sərhədlərarası ticarətə təsir göstərməyə davam edir. İnvestorlar etimad, proqnozlaşdırılabilən və risklərə qarşı effektiv müdafiə mexanizmləri tələb edirlər. Son illərdə Azərbaycan bu istiqamətdə mühüm addımlar atıb: gömrük sistemlərinin modernləşdirilməsi, rəqəmsal ticarət platformalarının genişləndirilməsi, sərhəd prosedurlarının sadələşdirilməsi, müvafiq qanunvericilik bazasının təkmilləşdirilməsi, dövlət-özəl tərəfdaşlığı mexanizmlərinin və regional ikitərəfli investisiya fondlarının yaradılması bunlara nümunədir”, - deyə AZPROMO-nun rəhbəri qeyd edib.

Birbaşa xarici investisiyaların cəlb olunması üçün əlavə səylərə ehtiyac olduğunu deyən Yusif Abdullayev belə məqamda ticarət və investisiyalar üzrə risklərin azaldılması mexanizmlərinin xüsusi əhəmiyyət kəsb etdiyini sözlərinə əlavə edib: “İnvestisiya və İxrac Kreditlərinin Sığortalanması üzrə İslam Korporasiyası (ICIEC) kimi qurumlar investisiya və ticarətlə bağlı riskləri azaltmağa kömək edən vacib alətlər təqdim edir. Siyasi risk sığortası, ixrac kreditlərinin sığortalanması və kredit gücləndirmə həlləri sərhədlərarası əməliyyatlar və uzunmüddətli investisiyalar üçün daha təhlükəsiz mühit formalaşdırır. Ödəniş riskləri və layihələrin maliyyələşdirilməsi ilə bağlı narahatlıqların aradan qaldırılmasına kömək etməklə bu cür mexanizmlər əksər hallarda reallaşmayacaq investisiyaların həyata keçirilməsinə imkan yaradır. Şəriət prinsiplərinə uyğun ticarət maliyyələşdirilməsi və investisiya sığortası alətlərinin regional ticarət inteqrasiyasını dəstəkləmək məqsədilə daha effektiv tətbiq oluna biləcəyinə dair praktik nəticələr əldə olunacağını gözləyirik".

_{Fotoqraf - Orxan Kərimov}