Bakı Baş Səhiyyə Mərkəzi ötən il vətəndaşlara göstərilən xidmətlərin statistikasını açıqlayıb
Bakı, 4 fevral, AZƏRTAC
Ötən il Bakı Baş Səhiyyə Mərkəzinin strukturuna daxil olan ilkin səhiyyə xidməti göstərən tibb müəssisələrinə 1,6 milyona yaxın pasiyent müraciət edib. Ötən dövr ərzində ümumilikdə 6 milyondan çox ambulator müraciət qeydə alınıb.
Mərkəzin mətbuat xidmətindən AZƏRTAC-a verilən məlumata görə, 2025-ci ildə ilkin səhiyyə xidməti müəssisələrində vətəndaşlara 17 milyondan çox tibbi xidmət göstərilib. Onlardan 6559 nəfəri stasionar tibbi xidmət alan şəxslərdir.
Həmçinin ötən il mərkəzin strukturuna daxil olan ilkin səhiyyə xidməti müəssisələrində icbari dispanserizasiya prosesinə cəlb edilən uşaqların ümumi sayı 717 min 664 (94 faiz) nəfər olub. Müayinələr nəticəsində 59 min 234 (8 faiz) uşaqda müxtəlif xəstəliklər aşkar olunub. İcbari dispanserizasiya zamanı dispanser qeydiyyatına alınan 8431 uşaq il ərzində sağalma ilə dispanser qeydiyyatından çıxarılıb.
Bununla yanaşı, ötən il ərzində Bakı Baş Səhiyyə Mərkəzinə daxil olan qadın məsləhətxanalarında 16 min 428 hamilə qadın qeydiyyata alınıb və onlara qeydiyyatda olduqları tibb müəssisələrində antenatal xidmət göstərilib.
Bölmənin digər xəbərləri
