BAKI BİZNES UNİVERSİTETİNDƏ MİLLİ İQTİSADİYYATIN İNKİŞAF ETDİRİLMƏSİ İSTİQAMƏTLƏRİ MÜZAKİRƏ OLUNMUŞDUR
AZƏRTAC-ın müxbiri xəbər verir ki, bu təhsil ocağının və AMEA-nın İqtisadiyyat İnstitutunun təşkil etdiyi konfransı giriş sözü ilə təhsil nazirinin müavini, tarix elmləri doktoru İradə Hüseynova açmışdır. O, ümummilli liderimiz Heydər Əliyevin rəhbərliyi ilə ölkəmizdə həyata keçirilən iqtisadi inkişaf strategiyasından, dövlət quruculuğu proqramından danışmış, 1991-1993-cü illərdə Azərbaycanın düşdüyü böhranlı vəziyyəti, müstəqilliyin itirilməsi, respublikanın dağılması təhlükəsini xatırlatmış və dövlətçiliyimizə qarşı yönəlmiş qəsdlərdən xalqımızın böyük oğlunun müdrikliyi sayəsində qurtulduğumuzu vurğulamışdır.
Natiq qeyd etmişdir ki, məhz Heydər Əliyevin titanik səyləri sayəsində iqtisadi quruculuq sahəsində islahatlar proqramı hazırlanıb həyata keçirilmiş, Azərbaycana xarici sərmayənin qoyulması üçün şərait yaranmış, yeni iqtisadi və siyasi, dövlət quruculuğu mərhələsinə keçməyin təməli qoyulmuşdur. Qısa müddətdə keçdiyimiz tarixi yolun əsas nəticələrini əbədi liderimizin özü belə ümumiləşdirmişdir: “Biz birinci növbədə, mülkiyyətin özəlləşdirilməsini təmin etdik. Kənd təsərrüfatında torpaq islahatı keçirdik. Torpağı onun sahibinə, kəndlilərə payladıq. Özəlləşdirmə, torpaq islahatı, xarici ticarətin, ümumiyyətlə, ticarətin liberallaşdırılması, xarici sərmayələrin cəlb olunması-bunlar hamısı qısa bir zamanda Azərbaycanın iqtisadiyyatının ardıcıl surətdə inkişaf etməsinə şərait yaratdı”.
Milli Məclisin elm və təhsil məsələləri daimi komissiyasının sədri professor Şahlar Əsgərov, Qadın Problemləri üzrə Dövlət Komitəsinin sədri professor Zəhra Quliyeva konfrans iştirakçılarını salamlayıb, onlara uğurlar arzulamışlar.
Milli Məclisin iqtisadi siyasət daimi komissiyası sədrinin müavini professor Əli Əlirzayevin “Sosial-iqtisadi inkişaf konsepsiyası”, AMEA-nın İqtisadiyyat İnstitutunun direktoru, AMEA-nın müxbir üzvü Şahbaz Muradovun “Müasir mərhələdə Azərbaycanda demoqrafiya, məşğulluq və işsizlik sahəsində dövlət siyasətinin əsas istiqamətləri”, Dövlət Sosial Müdafiə Fondunun sədri Səlim Müslümovun “Azərbaycanda sosial sığorta və pensiya islahatları”, Bakı Biznes Universitetinin rektoru professor İbad Abbasovun “Azərbaycan sosial-iqtisadi inkişafın yeni mərhələsində” adlı məruzələri maraqla dinlənilmişdir.
Məruzələrdə sosial-iqtisadi inkişafın sürətləndirilməsi konsepsiyasının ilkin şərtləri araşdırılmış, belə bir ümumi fikir ifadə olunmuşdur ki, respublikada həyata keçirilən islahatlar nəticəsində bütün sosial-iqtisadi sahələrdə inkişafın dinamik artımı və köklü keyfiyyət dəyişiklikləri baş vermişdir. Neft sənayesinə yatırılan xarici kapital bu sahədə istehsalın artmasına səbəb olmuşdur. Əhalinin sosial təminatı, maddi rifahının yaxşılaşdırılması, yoxsulluğun azaldılması sahəsində Azərbaycan Prezidentinin rəhbərliyi altında bir sıra layihələr hazırlanıb həyata keçirilir, “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” 2003-cü il 24 noyabr tarixli Fərman, beş illik “Azərbaycan Respublikası regionlarının sosial-iqtisadi inkişafı Dövlət Proqramı” reallaşdırılır.
Konfrans öz işini bölmələrdə davam etdirmişdir.
