BAKI SİRKİNDƏ YENİ MÖVSÜMÜN AÇILIŞINA HƏSR OLUNMUŞ MƏTBUAT KONFRANSI KEÇİRİLMİŞDİR
Sirkin direktoru Mirvaqif Bağırzadə tədbiri açaraq bildirmişdir ki, burada yeni mövsüm oktyabrın 18-də açılacaqdır. Bakıda ilk dəfə göstəriləcək “Buz planet” adlı proqramda 30-dan artıq sirk artisti iştirak edəcəkdir. Bütün nömrələr təbii buz üzərində nümayiş olunacaqdır. Tamaşaçılara təqdim edilən nömrələrdə ağ ayılar, itlər, pişiklər və sair heyvanların çıxışları da maraq doğuracaqdır.
Rusiya Federasiyasından olan iştirakçı heyət artıq Bakıdadır.
Truppanın icraçı direktoru Vladimir Skripniçenko və proqramın rəhbəri Yana Şevçenko təmsil etdikləri kollektiv barədə məlumat vermişlər. Vurğulanmışdır ki, onlar iki il yarımdır ki, fəaliyyət göstərirlər. Ötən müddətdə bir sıra xarici ölkələrin sirk meydançalarında uğurla çıxış etmişlər.
Sirk ustaları ümidvar olduqlarını diqqətə çatdırdılar ki, onların Bakıda bir ay davam edəcək çıxışları da paytaxt tamaşaçıları tərəfindən maraqla qarşılanacaqdır.
Bölmənin digər xəbərləri
