BAKI SLAVYAN UNİVERSİTETİNİN REKTORU,PROFESSOR KAMAL ABDULLAYEVİN ÇIXIŞI
Xanımlar və cənablar!
Bu gün təqdimatına toplaşdığımız dəyərli əsərin müzakirəsinə keçməmişdən öncə, icazənizlə, öz təəssüratımı sizinlə bölüşüm. Şübhəsiz ki, böyük şəxsiyyət, böyük mənada insan, böyük dövlət xadimi, təkcə Azərbaycana yox, dünyaya məxsus bir insan olan cənab Heydər Əliyev haqqında keçmiş zamanda danışmaq, təbii ki, çox ağırdır. Həmişə bizə elə gəlir ki, o, bizimlədir. Onun nəfəsini, onun işığını biz bu gün də duymaqdayıq.
Onun haqqında olan xoş sözlər, tədqiqatlar, onunla bağlı təəssüratlar hamımıza bəllidir və bunlar kitablar, monoqrafiyalar, məqalələr şəklində işıq üzü görüb və bundan sonra da görəcəkdir. Amma qeyd etmək istərdim ki, bu gün təqdimatına yığışdığımız bu sanballı, Əliyevşünaslığa, bütövlükdə Vətənşünaslığa dəyərli töhfə xüsusilə seçilir. Nə ilə? Biz həmişə öz Prezidentimizi yaxından tanıyıb, onun bütün fəaliyyətini duyduqlarını görüb, onunla eyni istiqamətə baxanlardanıq və bizim onun haqqında dediklərimiz şahidi olduqlarımız barədə açıq həqiqətdir. Amma bu kitabda toplanmış dəyərli materiallar, təəssüratlar, fikirlər, sözlər bütün dünyanın tanıyıb qəbul etdiyi görkəmli dövlət xadimlərinə, mədəniyyət, incəsənət ustalarına məxsusdur. Artıq bu, elə bir həqiqətdir ki, ən ali mərhələdə məskən salmışdır.
Deyirlər ki, öz Vətənində, öz məmləkətində Peyğəmbər olmaq çətin məsələdir, mümkün deyildir. Heydər Əliyev sübut elədi ki, öz məmləkətində də Peyğəmbər olmaq mümkündür və bu gün o, sözün əsl mənasında, öz məmləkətinin Peyğəmbəridir və dünyanın qəbul etdiyi, dəyərləndirdiyi, dünyanın ən yüksək bilik və mərifət, ağıl sahiblərinin qəbul edib qiymətləndirdikləri bir şəxsiyyətdir.
Mənim gözümün qarşısından heç zaman çəkilməyən bir obraz var, - bunu həmişə demişəm və deyəcəyəm, - Müəllim-Prezident, əlində sinif müəllimlərinin tutduğu çubuqla xəritə qarşısında dünya dövlətlərinin başçılarına Azərbaycan, onun həqiqəti, onun bu günü, başına gələn bəlalar haqqında danışan, ürəyi yanğılı, beyni, qəlbi, varlığı Azərbaycan eşqi ilə dolu bir Prezident var. Bu, bizim hamımızın gözünün qarşısından heç zaman çəkilməyəcək bir obrazdır.
Mənim gözümün qarşısında dəfələrlə ən ekstremal, gərgin hallarda Azərbaycan xalqının imdadına yetişmiş, həyatı qayıdışlarla dolu olan bir insan, böyük bir şəxsiyyət var. Hakimiyyətə qayıdışı gözümüzün önündən keçir. Prezidentimizin zəlzələ zamanı, ən ağır vaxtlarda evindən işinə qayıdışı gözümüzün önündən keçir. Bu gün də Prezidentimizin bir qayıdışı da onun siyasi və mənəvi varisi olan cənab İlham Əliyevin simasında, şəxsiyyətində olan qayıdışıdır, yenidən Azərbaycana qayıdışıdır, yenidən dünyaya qayıdışıdır.
Bu kitabı vərəqlərkən çoxumuz Heydər Əliyev şəxsiyyəti barədə təəccüblərini, ən gözəl ürək sözlərini deməkdən özünü saxlaya bilməyən, qiyabidən-qiyabiyə tanıdığımız böyük və görkəmli dövlət xadimlərinin fikirləri gözümüzün önündən keçəcəkdir. Bu kitabı vərəqlərkən insanın qəlbi onu ərsəyə gətirənlərə minnətdarlıq hissi ilə dolur. İdeya müəllifi və buraxılışına məsul fəlsəfə elmləri doktoru, professor Ramiz Mehdiyev olan, AZƏRTAC-ın əməkdaşlarının iştirakı ilə nəfis şəkildə, çox yüksək zövqlə hazırlanmış kitabda zəhməti olan hər bir adama təşəkkür düşür. Xüsusilə, rəssamlarına, tərtibatçılarına, redaktorlarına. Bu kitabın işıq üzü görməsində xidməti olmuş AZƏRTAC-ın baş direktoru Aslan Aslanova təşəkkür düşür. Bütün bunların hamısı bir yerdə böyük Heydər Əliyevə məhəbbətdir ki, bax belə sanballı, dəyərli əsərdə öz inikasını tapmışdır.
Ramiz müəllimi biz Heydər Əliyevin ən yaxın silahdaşlarından biri kimi tanıyırıq və cənab Prezidentlə uzun illər bərabər çalışması imkan vermişdir ki, onun haqqında deyilən sözlər, onun şəxsiyyətinin genişliyi və bütövlüyü burada, həqiqətən, adekvat şəkildə öz əksini tapsın.
Heydər Əliyev şəxsiyyəti haqqında çox söz demək olar. Burada çıxış edənlər olacaq və onlar ürək sözlərini deyəcəklər. Heydər Əliyev haqqında çox sözlər yazılacaq və onlar hamının – Heydər Əliyevi sevərlərin, Heydər Əliyev şəxsiyyətinin nə demək olduğunu dərindən anlayanların stolüstü kitabı olacaqdır.
Amma bu kitab məktəblidən tutmuş, ixtisasından asılı olmayaraq, hər bir insan üçün çox dəyərli bir vəsaitdir desək, yəqin səhv etmərik. Məktəbli, tələbə, müəllim bu kitabda Heydər Əliyevə qayıdacaqlar. Bu dəfə kənardan, dünyadan - İngiltərədən, Amerikadan, Fransadan, Türkiyədən, İrandan, Rusiyadan – bütün bu nöqtələrdən Heydər Əliyev şəxsiyyətinin böyüklüyü bir daha görünəcəkdir.
Mənim yadıma bu kitabın əsas səhifələrindən birini təşkil edən Rusiyanın Prezidenti cənab Putinlə olan görüş düşür. O görüşdə cənab Putinin bizim Prezidentimiz haqqında dediyi xoş sözlər bu kitabda öz əksini tapıbdır. O görüşlə bağlı mən öz təəssüratımı bölüşmək istəyirəm. Cənab Putinə Bakı Slavyan Universitetinin fəxri doktor adı verilən görüşdə mən də iştirak edirdim. Təsəvvür etməzsiniz, cənab Putin bizim Prezidentimizə ən adi məqamlarda nə dərəcədə böyük ehtiramla münasibət bəsləyirdi. Bu, təkcə dövlət başçısının sözdə deməli olduğu ehtiramın təzahürü deyildi. Bu, Prezidentimizin böyüklüyünə, ağsaqqallığına, dünyagörüşünə, Heydər Əliyev yüksəkliyinə verilən layiqli bir qiymət idi.
Yenə demək istəyirəm, kaş o, bu gün sağ olaydı. Kaş bu gün onun nəfəsi gələydi. Azərbaycanın onunla bir və ondan sonra getdiyi yola baxaydı, bu yolun yolçularına baxaydı, öz mənəvi-siyasi varisinin uğurlarına sevinəydi. İnanıram ki, onun ruhu bu gün buradadır.
Bölmənin digər xəbərləri
