Bakı, 10 yanvar, AZƏRTAC

Qazaxıstan Respublikasının Almatı Heyvanat Parkından gətirilən “Simba” adlı beş yaşlı erkək şir Bakı Zooloji Parkının daimi sakininə çevrilib. O, əvvəlcə parkın karantin zonasında bir ay ərzində baytarlıq nəzarəti altında saxlanılıb, daha sonra iki dişi şirin olduğu daimi yaşayış yerinə köçürülərək uğurla adaptasiya prosesini tamamlayıb və bir ailəyə çevriliblər.

Bakı Zooloji Parkından AZƏRTAC-a bildirilib ki, erkək şirin Bakı Zooloji Parkına gətirilməsi Almatı Heyvanat Parkı ilə aparılan beynəlxalq mübadilə çərçivəsində həyata keçirilib.

Dünyanın ən iri ikinci yırtıcı pişikkimiləri olan şirlər (Panthera leo) ən çox Şərqi və Cənubi Afrikanın geniş və açıq düzənliklərində, savannalarda, meşələrdə və yarımsəhra ərazilərində məskunlaşır. Dişi fərdlər, balalar və bir neçə erkək fərd “prayd” adlanan qruplarda yaşayırlar. Vəhşi təbiətdə 10-14, qapalı şəraitdə isə təhlükələrdən uzaq olduqları üçün daha çox, təxminən 20 il ömür sürürlər. 1-4 baş doğulan balaların qayğısına yalnız ana şir yox, həm də praydın digər dişi fərdləri qalır. Şirlər qida zəncirində mühüm rol oynayaraq, ekosistemin tarazlığını qoruyur və biomüxtəlifliyin təmin edilməsində əhəmiyyətli yer tuturlar.

Bakı Zooloji Parkı biomüxtəlifliyin qorunmasına yönəlmiş təşəbbüslərlə ekosistemləri qorumaq və təlim, tədris fəaliyyətləri vasitəsilə geniş ictimaiyyəti biomüxtəlifliyin əhəmiyyəti barədə məlumatlandırır. Zooloji Parkın əsas məqsədi Azərbaycanın “Qırmızı Kitab”ına daxil, nadir və nəsli kəsilmək üzrə olan heyvan növlərinin qorunub saxlanılması, çoxaldılaraq yenidən təbiətə buraxılmasını təmin etməklə yanaşı, həmçinin ziyarətçilər üçün canlı aləm haqqında bilik əldə edə biləcəkləri təhsil və maarifləndirmə layihələrini təşkil etməkdir. Həyata keçirilən tədbirlər, növlərin sayının artırılması və reintroduksiya layihələri gənc nəsillərə ekoloji məsuliyyət aşılamaqda və biomüxtəliflik mövzusunda aydınlatmada mühüm rol oynayır.

Qazaxıstan Respublikasının Almatı Heyvanat Parkından Bakı Zooloji Parkına şirin gətirilməsi “Silk Way West Airlines” şirkəti tərəfindən təmənnasız olaraq həyata keçirilib.