BAKIDA DİSTANT TƏHSİL MÖVZUSUNDA SİMPOZİUM KEÇİRİLMİŞDİR
AZƏRTAC-ın müxbiri xəbər verir ki, tədbirdə tanınmış təhsil işçiləri, mütəxəssislər iştirak etmişlər. Azərbaycan Elmi-Tədqiqat və Təhsil Şəbəkələri Assosiasiyası (AzRENA) və Amerika Birləşmiş Ştatlarının İndiana Universiteti tərəfindən həyata keçirilən simpoziumu ABŞ Tərəfdaşlıq Proqramının Distant Təhsil Layihəsi təşkil etmişdir.
Təhsil naziri Misir Mərdanov tədbirdə çıxış edərək ABŞ-ın nüfuzlu ali məktəblərindən olan İndiana Universiteti ilə ölkəmizin ali təhsil müəssisələri, o cümlədən ADİU arasındakı əlaqələri yüksək qiymətləndirmiş, iştirakçılara uğurlar arzulamışdır.
Rabitə və İnformasiya Texnologiyaları naziri, AzRENA-nın prezidenti, akademik Əli Abbasov müasir qloballaşma şəraitində elektron və distant təhsilin mühüm əhəmiyyət kəsb etdiyini bildirmiş və yeni texnologiyalardan geniş istifadə olunmasının zəruriliyini söyləmişdir.
Prezident Administrasiyasının informasiya resursları və texnologiyaları mərkəzinin rəhbəri Elmir Vəlizadə cəmiyyətin inkişafında informasiya kommunikasiya texnologiyalarının müstəsna rolundan danışmış və bu sahənin inkişafına ölkəmizdə böyük önəm verildiyini vurğulamışdır.
İndiana Universitetinin professoru Tomas Daffi Distant Təhsil layihəsi ilə bağlı həyata keçirilən tədbirlərdən və onun əhəmiyyətindən söhbət açmışdır.
Sonra müasir şəraitdə distant təhsil, bu istiqamətdə dünyada aparıcı mövqe tutan ABŞ-ın təcrübəsi, onun Azərbaycanda tətbiqi və s. barədə maraqlı məruzələr dinlənilmiş, fikir mübadiləsi aparılmışdır.
Bölmənin digər xəbərləri
