Bakıda küçə itlərinə həsr olunmuş sərgi açılıb
Bakı, 18 may, AZƏRTAC
“New Zeon” məkanında “Yol kənarındakı mələklər” adlı fotosərginin açılışı keçirilib. Sosial-bədii layihənin müəllifləri rəssam Marina Vəliyeva və heyvan haqları müdafiəçisi Vüsalə Saydamdır. Ekspozisiyada küçə itlərinə həsr olunmuş 25 foto nümayiş etdirilib.
AZƏRTAC xəbər verir ki, layihədə sənədli fotoqrafiya və emosional vizual təqdimat vasitəsilə sahibsiz heyvanların problemi diqqətə çatdırılır, incəsənətlə sosial reallıq arasında dialoq yaradılır.
Sərgi ziyarətçilərinə itlərin fotoları əks olunan açıqcalar və tematik bukletlər təqdim olunub. Tədbir çərçivəsində it pəncəsi formasında gips fiqurların rənglənməsi üzrə master-klas da keçirilib. Lalə Həsənovanın rəhbərlik etdiyi “Modern Poems” Ədəbi Birliyinin gənc üzvləri insanın dördayaqlı dostlarına həsr olunmuş şeirlər səsləndiriblər.
Rəssam Marina Vəliyeva AZƏRTAC-ın müxbiri ilə söhbətində belə tədbirlərin cəmiyyət üçün əhəmiyyətindən danışıb.
“Bu layihə mənim üçün yalnız itlərdən bəhs etmir. Bu, insanın başqasının ağrısını görə bilməsi haqqındadır. Sərginin ideyası elə-belə yaranmadı. Şəhərdən kənara köçəndən sonra əvvəlcə sahibsiz itləri yemləməyə başladım. Sonra anladım ki, onlar sanki bizim dünyadan ayrı yaşayırlar – yanımızdadırlar, amma insanların çoxu onları görmür. Hər şey iri bir küçə itinin baxışından başladı. Həmin baxışdan gözümü çəkə bilmədim. Yaşadığımız ərazidə hələ abadlaşdırılmamış tərk edilmiş bir sahə var və bir neçə küçə iti orada məskunlaşıb. Mən bu heyvanlarda çox kövrək, xeyirxah və qəribə dərəcədə həssas bir nə isə gördüm. Sanki şəhərdə onlar üçün yer tapılmayıb. Onlara yalnız yol kənarını saxlayıblar. “Yol kənarındakı mələklər” adı da buradan yaranıb. Niyə mələklər? Çünki itlər saf, sədaqətli və duyğulu canlılardır. Heç nəyə baxmayaraq, onlar insana güvənməkdə davam edir. Mənə elə gəlir ki, belə layihələr cəmiyyət üçün çox vacibdir. Çünki küçə itlərinin tənhalığı və ağrısı bizim üçün adi hala çevrilib. Biz bunu hər gün görürük və artıq onlara yazığımız belə gəlmir. İncəsənət isə insana yenidən görməyi öyrədə bilər. Bəzən bir baxış, bir kadr insanın daxilində nəyisə dəyişməyə kifayət edir”, – deyə həmsöhbətimiz bildirib.
Onun sözlərinə görə, bu təşəbbüs insanlarda sahibsiz heyvanların kövrəkliyini görməyə və onlara biganə qalmamağa diqqət çəkmək cəhdidir.
“Əslində layihə üzrə tərəfdaşım Vüsalə Saydamla birlikdə mərhəmət hissi yaratmağa hesablanmış sərgi keçirmək istəmirdik. Acımaq insanla məsafə yaradır. Bizim üçün əsas olan diqqət və həssas yanaşma idi. Sərgidəki hər foto hansısa obraz və ya bədii fantaziya deyil. Bu fotodakılar bizimlə eyni şəhərdə yaşayan real itlərdir. Onların hər birinin tamamilə başqa həyatı ola bilərdi – evi, qayğı görən sahibi, sevgisi. Fotolar vasitəsilə göstərmək istədik ki, onlar şəhər mənzərəsinin bir hissəsi deyillər. Onlar ağrını da, sevinci də hiss edən böyük qəlbə malik canlılardır. Hər küçə itinin öz hekayəsi, öz xarakteri var. İncəsənətin dünyanı və ya şəhərdə sahibsiz heyvanlarla bağlı vəziyyəti bir anda dəyişəcəyinə əmin deyiləm. Amma inanıram ki, bu, insanların baxışını tədricən dəyişə bilər. Əgər sərgidən sonra heç olmasa, bir nəfər sahibsiz heyvana daha diqqətlə, daha isti münasibətlə və daha humanist yanaşacaqsa, deməli, görülən iş hədər olmayıb”, – deyə M.Vəliyeva vurğulayıb.
Müəllif – Anara Axundova
Bölmənin digər xəbərləri
