Bakıda qadına qarşı soyğunçuluq edən şəxs saxlanılıb
Bakı, 7 dekabr, AZƏRTAC
Bakının Binəqədi rayonu S.S.Axundov küçəsində naməlum şəxs paytaxt sakini olan qadının içərisində pul və mobil telefon olan çantasını soyğunçuluq yolu ilə talayaraq hadisə yerindən qaçıb.
Daxili İşlər Nazirliyinin mətbuat xidmətindən AZƏRTAC-a bildiriblər ki, zərərçəkən qadının müraciəti əsasında ərazinin yaxınlığında olan Binəqədi Rayon Mühafizə İdarəsinin əməkdaşları həmin şəxsi təqib edərək “isti izlər”lə yaxalanıb. Binəqədi Rayon Polis İdarəsinin 5-ci polis bölməsinə təhvil verilən şübhəli şəxsin paytaxt sakini - əvvəllər məhkum olunmuş Niyazi Fərəməzov olduğu müəyyənləşib. Bölmədə onun üzərində axtarış aparılarkən zərərçəkənin çantası, eləcə də pul və mobil telefon aşkarlanaraq götürülüb. Niyazi Fərəməzovun 5-ci polis bölməsində ətrafında əlavə əməliyyat tədbirləri keçirilən zaman onun Binəqədi rayonunda çoxmərtəbəli binaların girişlərindən velosipedlər oğurladığı da məlum olub.
Niyazi Fərəməzov barəsində 5-ci polis bölməsində toplanan materialları Binəqədi Rayon Polis İdarəsinin istintaq şöbəsinə göndərilib. Onun barəsində Cinayət Məcəlləsinin müvafiq maddəsi ilə cinayət işi başlanıb, araşdırmalar davam etdirilir.
Saxlanılan şəxsin əməllərindən zərərçəkən başqa vətəndaşlar olarsa, bu barədə ərazi üzrə polis idarə, şöbə və bölmələrinə, habelə DİN-in 102 - Zəng Mərkəzinə məlumat verə bilərlər.
Bölmənin digər xəbərləri
