Bakıda Türk Dünyası Ürək-damar Cərrahiyyəsi Birliyinin zirvə toplantısı keçirilib VİDEO
Bakı, 18 may, AZƏRTAC
Azərbaycan Ürək və Damar Cərrahiyyəsi Cəmiyyəti tərəfindən Ümummilli Lider Heydər Əliyevin xatirəsinə həsr olunmuş “Bakı Ürək Günləri” IX Beynəlxalq Konqresi təşkil olunub.
AZƏRTAC xəbər verir ki, konqres çərçivəsində Azərbaycan Ürək və Damar Cərrahiyyəsi Cəmiyyətinin təşəbbüsü ilə ötən il Türkiyədə təsis edilən Türk Dünyası Ürək-Damar Cərrahiyyəsi Birliyinin zirvə toplantısı keçirilib.
Toplantıya moderatorluq edən Azərbaycan Ürək və Damar Cərrahiyyəsi Cəmiyyətinin (AÜDCC) təsisçisi və fəxri sədri Kamran Musayev, kardioloq, tibb elmləri doktoru Firdovsi İbrahimov, Türk Ürək Damar Cərrahiyyəsi Dərnəyinin sədri Murat Sarğın qeyd ediblər ki, zirvə toplantısında türk dövlətlərinin kardioloqları öz ölkələrində ürək-damar cərrahiyyəsinin vəziyyəti ilə bağlı məlumat verməsi olduqca vacibdir. Tibbin bütün sahələrində fikir mübadiləsi aparmaq inkaşafa dəstək verir.
Daha sonra Türkiyə, Azərbaycan, Qazaxıstan, Qırğızıstan, Türkmənistan və Özbəkistanda ürək cərrahiyyəsinin tarixi və indiki vəziyyəti ilə bağlı mövzular müzakirə olunub.
Türkiyəli kardioloq Alpər Səlim Kocaoğlu Türkiyədə ürək-damar cərrahiyyəsinin son onilliklərdə böyük inkişaf yolu keçdiyinə diqqət çəkib: “1960-cı illərdən etibarən ilk açıq ürək əməliyyatları ilə başlanan bu yol, bu gün artıq dünya standartlarına cavab verən yüksək texnologiyalı mərkəzlərlə davam edir. Hazırda ölkəmizdə bir çox universitet xəstəxanaları və ixtisaslaşmış ürək mərkəzləri, həm açıq, həm də minimal invaziv üsullarla mürəkkəb əməliyyatlar həyata keçirir. Türkiyədə ildə on minlərlə ürək əməliyyatı uğurla icra olunur və nəticələr beynəlxalq səviyyədə qəbul olunur”.
Qazaxıstanlı kardioloq Muradym Murzagaliyev öz ölkəsində ürək-damar cərrahiyyəsinin son illərdə əhəmiyyətli inkişaf mərhələsindən keçdiyini bildirib: “Xüsusilə paytaxt Astana və Almatı şəhərlərində yerləşən ixtisaslaşmış tibb müəssisələri bu sahədə həm texniki, həm də elmi baxımdan güclü infrastruktur yaradıb. 2000-ci illərdən sonra dövlət tərəfindən səhiyyəyə, xüsusilə kardioloji və cərrahi xidmətlərə yatırılan sərmayələr nəticəsində bir çox müasir kardiocərrahiyyə mərkəzləri istifadəyə verilib. Hazırda Qazaxıstanda açıq ürək əməliyyatları, koronar by-pass, damar protezləmələri və ürək qapaqlarının dəyişdirilməsi uğurla həyata keçirilir.
Eyni zamanda, Qazaxıstanda kardioloji xidmətlərin regional səviyyədə də əlçatan olması üçün böyük addımlar atılır”.
Qırğızıstanlı kardioloq Samiddin Shabiraliyev Qırğızıstanda ürək-damar cərrahiyyəsi sahəsinin son illər inkişaf etməkdə olduğunu deyib. O qeyd edib ki, Qırğızıstanda ürək-damar xəstəlikləri əsas ölüm səbəblərindən biri olduğu üçün bu sahədə güclü səhiyyə strategiyalarına hər zaman ehtiyac var: “Qırğızıstan Səhiyyə Nazirliyi bu prosesin mərkəzində dayanır və ölkədə ürək-damar cərrahiyyəsinin inkişafında mühüm rol oynayır”.
Türkmənistanlı kadioloq Rəcəb Əliyevin sözlərinə görə, Türkmənistanın səhiyyə sahəsində geniş islahatlar aparılıb və ürək-damar xəstəliklərinin diaqnostikası, müalicəsi istiqamətində mühüm addımlar atılıb. “Paytaxt Aşqabadda ölkənin aparıcı ürək-damar cərrahiyyəsi müəssisələri yerləşir. Burada açıq ürək əməliyyatları, qapaq dəyişdirmə və damar rekonstruksiyası kimi mürəkkəb prosedurlar uğurla icra olunur.
Bununla yanaşı, ölkədə yeni tibbi mərkəzlərin qurulması, müasir avadanlıqların alınması və ixtisaslı həkimlərin hazırlanması sahəsində davamlı işlər görülür. Xarici ölkələrlə, xüsusilə Türkiyə, Almaniya və Rusiya ilə təcrübə mübadiləsi və təlim proqramları da inkişafı dəstəkləyir”, - deyə R.Əliyev bildirib.
Özbəkistanlı kardioloq Xamidulla Abdumajidov ölkəsində həyata keçirilən islahatlar nəticəsində yeni ixtisaslaşmış tibb müəssisələrinin yaradıldığına, mövcud mərkəzlərin isə müasir tibbi avadanlıqlarla təmin olunduğuna diqqət çəkib. O vurğulayıb ki, paytaxt Daşkənddə yerləşən qabaqcıl xəstəxanalar bu sahədə aparıcı rol oynayır: “Xəstəxanalarda minimal invaziv texnologiyaların tətbiqi genişlənib. Özbəkistan kardiocərrahları həm yerli, həm də beynəlxalq səviyyədə təlim və təcrübə proqramlarında iştirak edərək öz bilik və bacarıqlarını daim təkmilləşdirirlər. Bu da əməliyyat keyfiyyətinə və xəstə məmnuniyyətinə birbaşa təsir göstərir.
Gələcəkdə məqsədimiz – regionlarda da yüksək səviyyəli kardiocərrahiyyə xidmətlərini əlçatan etmək, süni intellekt və rəqəmsal texnologiyaları klinik praktikaya daxil etmək və beynəlxalq əməkdaşlığı daha da genişləndirməkdir”.
Azərbaycanlı kardioloq Ramil Əliyev isə ölkəmizdə ürək-damar cərrahiyyəsinin son 20 ildə sürətli şəkildə inkişaf etdiyini bildirib: “Xüsusilə 2000-ci illərdən etibarən paytaxt Bakıda və bir sıra regionlarda müasir tibb mərkəzləri fəaliyyətə başlayıb, bu sahəyə həm dövlət, həm də özəl sektor tərəfindən əhəmiyyətli sərmayələr qoyulub.
Hazırda Mərkəzi Klinik Xəstəxana, Akademik C.Abdullayev adına Elmi-Tədqiqat Kardiologiya İnstitutu və digər qabaqcıl tibb müəssisələrində açıq ürək əməliyyatları, koronar arter by-pass, ürək qapaqlarının dəyişdirilməsi, aorta və digər damarların rekonstruksiyası uğurla icra olunur. Bununla yanaşı, minimal invaziv üsulların tətbiqi də getdikcə genişlənib.
Azərbaycanlı cərrahlar beynəlxalq təcrübə proqramlarında fəal iştirak edir, həmçinin ölkəyə dəvət olunan xarici mütəxəssislərlə birgə əməkdaşlıq çərçivəsində bilik və təcrübə mübadiləsi həyata keçirilir”.
Qeyd edək ki, dünyanın 20-dən artıq ölkəsindən 400-ə yaxın yerli və əcnəbi kardioloq və kardioccərahın iştirakı ilə keçirilən konqresin əsas məqsədi Azərbaycanda kardiologiyanın və ürək-damar cərrahiyyəsinin inkişafına töhfə vermək, əcnəbi mütəxəssislərlə birgə fikir mübadiləsi aparmaq, tibb elminin bu sahədəki son yeniliklərini müzakirə etmək olub. “Bakı Ürək Günləri” IX Beynəlxalq Konqresi Azərbaycan Respublikası Səhiyyə Nazirliyi tərəfindən Davamlı Tibbi Təhsil verən tədbir kimi tanınıb və konqres iştirakçıları 20 DTT balı əldə edib.
Bölmənin digər xəbərləri
