Banqladeşin sabiq Baş nazirinə məxsus 9,7 kiloqram qızıl-zinət əşyaları tapılıb
Bakı, 26 noyabr, AZƏRTAC
Banqladeş Korrupsiyaya Qarşı Mübarizə Komissiyası məhkəmə qərarından sonra sabiq Baş nazir Şeyx Hasinanın bank seyflərini açıb və oradakı 9,7 kiloqram qızıl-zinət əşyalarını müsadirə edib.
AZƏRTAC BSS informasiya agentliyinə istinadla xəbər verir ki, iki bankdakı üç seyf hakimin, bank işçilərinin, vergi və kəşfiyyat xidmətlərinin, mərkəzi bankın nümayəndələrinin iştirakı ilə açılıb. Seyflərdən biri boş olub, digər ikisində isə 4,9 və 4,8 kiloqram qızıl-zinət əşyaları aşkarlanıb.
Mütəxəssislər seyflərdəki qeydləri araşdırıb və əşyaların Şeyx Hasinaya və onun ailə üzvlərinə aid olduğu qənaətinə gəliblər. İnventarizasiyadan sonra qızıl-zinət əşyaları saxlanmaq üçün müvafiq bankların filiallarına təhvil verilib.
2024-cü ilin iyulunda Banqladeşdə yüksək işsizlik səviyyəsindən və iqtisadi perspektivlərin olmamasından narazı tələbələrin fəal iştirakı ilə hökumət əleyhinə etirazlar baş qaldırıb. İğtişaşlar və polislə toqquşmalar nəticəsində 1400-ə yaxın insan həlak olub. Həmin ilin avqustunda Şeyx Hasina Hindistana qaçıb.
Bu il noyabrın 17-də Banqladeş məhkəməsi sabiq Baş naziri iğtişaşların yatırılması zamanı törətdiyi cinayətlərə görə qiyabi ölüm hökmünə məhkum edib.
Bölmənin digər xəbərləri
