BARAK OBAMA BEYNƏLXALQ OLİMPİYA KOMİTƏSİNİ ÇİKAQONUN NAMİZƏDLİYİNİ DƏSTƏKLƏMƏYƏ ÇAĞIRMIŞDIR
Bakı, 7 aprel (AZƏRTAC). ABŞ Prezidenti Barak Obama Beynəlxalq Olimpiya Komitəsinin üzvlərini 2016-cı ilin Olimpiya oyunlarının paytaxtı kimi Çikaqonu dəstəkləməyə çağırmışdır. O, xüsusi videomüraciətində “Küləklər şəhəri”nin üstünlüklərindən danışaraq demişdir: “Bu, bütün irqlərin, dinlərin və millətlərin nümayəndələrinin yaşayıb-yaratdıqları və “Amerika arzusuna” qovuşduqları bir şəhərdir”. Onun sözlərinə görə, “bu şəhərin məktəblərində ən müxtəlif dillər eşidilir, küçələrdə Latın Amerikası cazından tutmuş hindli nəğmələrinədək müxtəlif musiqi motivləri səslənir”.
Hazırda Çikaqonun imkanlarını BOK-un qiymətləndirmə komissiyasının üzvləri öyrənir. Obama müraciətində əmin olduğunu bildirmişdir ki, onlar artıq 2016-cı ilin oyunlarının keçirilməsinə hazır olan gözəl qonaqpərvər şəhərdə olduqlarını yəqin ki, başa düşmüşlər.
Çikaqo Qiymətləndirmə Komissiyasının Olimpiadanın keçirilməsi hüququna namizəd kimi səfər etdiyi ilk şəhər olmuşdur. Komissiyanın üzvlərinin aprelin ikinci yarısında Rio-de-Janeyroda, may ayında isə Madriddə olacağı gözlənilir. BOK son seçimini bu ilin oktyabrında edəcəkdir.
Bölmənin digər xəbərləri
