BDU ilə Qazaxıstanın Süleyman Dəmirəl Universiteti arasında anlaşma memorandumu imzalanıb
Bakı, 6 fevral, AZƏRTAC
Bakı Dövlət Universiteti (BDU) ilə Qazaxıstan Respublikasının Süleyman Dəmirəl Universiteti arasında əməkdaşlıq haqqında anlaşma memorandumu imzalanıb.
BDU-dan AZƏRTAC-a bildirilib ki, müqaviləni rektor Elçin Babayev və Qazaxıstanın Süleyman Dəmirəl Universitetinin rektoru Alimjan İgenbayev imzalayıblar.
Anlaşma memorandumu akademik, elmi və mədəni mübadilə imkanlarının inkişafını, elmi-tədqiqat işlərində əməkdaşlıq məsələlərini özündə əks etdirir. Memorandum çərçivəsində birgə konfrans, seminar, simpoziumların keçirilməsi, elmi jurnallarda məqalələrin çap edilməsi, ortaq tədqiqat layihələri, mədəni proqramların təşkili, tələbə, tədqiqatçıların, akademik və inzibati heyətin mübadiləsi kimi məsələlər nəzərdə tutulub.
Qeyd edək ki, Qazaxıstanın Süleyman Dəmirəl Universitetinin əsası 1996-cı ildə qoyulub. Dörd fakültənin fəaliyyət göstərdiyi universitetdə 9000-ə yaxın tələbə təhsil alır.
Bölmənin digər xəbərləri
