BDU-nun rektoru: Ali təhsil müəssisələri arasında rəqabət obyektiv nəticələr əsasında aparılmalıdır
Bakı, 23 iyun, AZƏRTAC
Ən böyük səhvimiz odur ki, akkreditasiyanı bir növ “cəzalandırma” prosesi kimi qəbul edirik. Əslində, bu proses bir süzgəcdən keçməkdir və onun əsas məqsədi universitetin inkişafına xidmət etməkdir.
AZƏRTAC xəbər verir ki, bunu Bakı Dövlət Universitetinin rektoru Elçin Babayev “Keyfiyyətə doğru addım: akkreditasiya prosesinə hazırlıq” seminarında çıxışı zamanı deyib. O bildirib ki, universitetdə keyfiyyət təminatı anlayışı yalnız tədrislə məhdudlaşmamalıdır: “Bu anlayışa elm, beynəlxalq əməkdaşlıq və hətta təsərrüfat işləri daxildir. Biz BDU-da Keyfiyyət Təminatı Mərkəzini yaradarkən də məhz bu yanaşmanı əsas götürdük”.
Rektor əlavə edib ki, akkreditasiya prosesi, eyni zamanda, həyəcanverici bir mərhələdir: “Biz bu prosesi yeni qaydalara və reallıqlara uyğun şəkildə keçdik. Hazırlıq mərhələsində birbaşa iştirak etdim. Ali təhsil müəssisələri arasında rəqabətin mövcudluğu müsbət haldır. Rəqabət motivasiya yaradır. Lakin bu rəqabət sağlam olmalıdır, bir-birinə qarşı ittiham və ya neqativ münasibətlə deyil, obyektiv nəticələr əsasında aparılmalıdır. Əsas məsələ nəticədir”.
Bölmənin digər xəbərləri
