BDU-nun tələbələri “AzerGold” şirkətində təcrübə keçəcək
Bakı, 18 fevral, AZƏRTAC
Bakı Dövlət Universitetinin (BDU) rektoru Elçin Babayevin “AzerGold” Qapalı Səhmdar Cəmiyyətinin (QSC) İdarə Heyəti sədrinin müavini Xəyyam Fərzəliyev və qurumun digər nümayəndələri ilə görüşü olub.
Universitetdən AZƏRTAC-a bildiriblər ki, BDU və “AzerGold” QSC arasında imzalanmış protokola uyğun olaraq keçirilən görüşdə illik müştərək fəaliyyət planı müzakirə edilib.
Protokola uyğun olaraq universitetdə “AzerGold” QSC-nin fəaliyyəti ilə bağlı təqdimatın keçirilməsi, gənc mütəxəssislər üçün “Universitetdən karyeraya uğurlu keçid” mövzusunda seminarların təşkili, təhsil müəssisəsi tərəfindən keçiriləcək Karyera həftəsində “AzerGold” QSC-nin əməkdaşlarının iştirakının təmin edilməsi, o cümlədən cəmiyyətin fəaliyyət istiqamətlərinə uyğun ixtisasları üzrə təhsil alan tələbələrinin istehsalat təcrübəsinə göndərilməsi reallaşdırılacaq.
Görüşdə, həmçinin “AzerGold” QSC-nin əməkdaşları tərəfindən BDU-da təhsil alan tələbələr üçün müvafiq proqramlar üzrə master-klassların təşkili, tələbələrə geoloji-kəşfiyyat və dağ-mədən sənayesinin özəllikləri mövzusunda təlim-seminarın keçirilməsi barədə ilkin razılıq əldə olunub.
Sonda “AzerGold”un nümayəndələri universitetin geologiya və coğrafiya fakültələrində olub, Faydalı qazıntılar muzeyini ziyarət ediblər.
Bölmənin digər xəbərləri
