“BƏDƏN TƏRBİYƏSİ VƏ İDMAN HAQQINDA” YENİ QANUN HAZIRLANIR
Bakı, 8 aprel (AZƏRTAC). Aprelin 8-də Milli Məclisin sosial siyasət komitəsinin iclası keçirilmişdir.
Komitənin sədri Hadi Rəcəbli gündəlikdəki məsələ - “Bədən tərbiyəsi və idman haqqında” qanun layihəsi barədə məlumat vermişdir. Komitə sədri diqqətə çatdırmışdır ki, ölkəmizdə bu sahədə mövcud qanunvericilik artıq günün tələblərinə cavab vermir. Ona görə də idman sahəsində hüquqi münasibətləri tənzimləyəcək yeni qanuna ehtiyac vardır və deputatlar mütəxəssislərlə birlikdə yeni layihə hazırlamışlar. Qeyd olunmuşdur ki, yeni qanun layihəsinin hazırlanmasında bir sıra model qanunlardan istifadə olunmuş, dünya təcrübəsi öyrənilmişdir. Bildirilmişdir ki, bu qanun ölkəmizdə bədən tərbiyəsi və idman sahəsində fəaliyyətin təşkilati -hüquqi, sosial-iqtisadi əsaslarını və dövlət siyasətinin əsas prinsiplərini müəyyən edəcəkdir.
Sonra qanun layihəsi geniş müzakirə olunmuş, deputatlar və müvafiq nazirliklərin nümayəndələri çıxış edərək sənəd barədə fikirlərini, rəy və təkliflərini bildirmişlər.
İclasda səslənən təkliflər, fikirlər və rəylər əsasında qanun layihəsi üzərində işin davam etdirilməsi və sənədin daha da təkmilləşdirilməsi qərara alınmışdır.
Bölmənin digər xəbərləri
