BƏƏ-dəki “Azərbaycan” Cəmiyyəti Xocalı soyqırımı ilə bağlı görüşlər keçirmişdir
Bakı, 20 fevral (AZƏRTAC). Birləşmiş Ərəb Əmirliklərində (BƏƏ) fəaliyyət göstərən “Azərbaycan” Cəmiyyətinin sədri Samir İmanov Xocalı soyqırımının 20-ci ildönümü ilə bağlı bir sıra görüşlər keçirmişdir.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, silsilə tədbirlər çərçivəsində S.İmanov Dubay əmirliyinin Alimlər Şurasının sədri, aylıq “Əl-Diya” və “Əl-Əhmədiyyə” elmi-ictimai jurnallarının baş redaktoru, doktor Məhəmməd Əhməd Əl-Quraşi ilə görüşmüşdür.
Cəmiyyətin sədri Məhəmməd Əhməd Əl-Quraşiyə Ermənistan-Azərbaycan, Dağlıq Qarabağ münaqişəsi və ermənilərin Xocalı şəhərində törətdikləri soyqırımı aktı barədə məlumat vermişdir. S.İmanov Xocalı faciəsinin dünya ictimaiyyətinə çatdırılması üçün Dialoq və Əməkdaşlıq uğrunda İslam Konfransı Gənclik Forumunun (DƏ-İKGF) mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə aparılan “Xocalıya ədalət” beynəlxalq kampaniyası haqqında da danışmışdır.
Cəmiyyətin sədri bu soyqırımının dünya ictimaiyyətinə çatdırılmasında ümummilli lider Heydər Əliyevin böyük əməyi olduğunu qeyd etmişdir. Bildirilmişdir ki, məhz ulu öndərin xalqın tələbi ilə hakimiyyətə yenidən qayıdışından sonra Xocalı soyqırımına respublikada siyasi-hüquqi qiymət verilmişdir. S.İmanov ümummilli liderin təşəbbüsü ilə Xocalı qətliamının soyqırımı kimi tanındığını, fevralın 26-nın Xocalı soyqırımı və milli hüzn günü kimi qeyd olunduğunu demişdir.
Məhəmməd Əl-Quraşi Xocalı həqiqətlərinin dünya ictimaiyyətinə çatdırılmasına böyük ehtiyac olduğunu və alimlərin də bu işdə iştirakının zəruriliyini vurğulamışdır. O, ölkəmizə səfər etmək arzusunda olduğunu qeyd etmişdir. Məhəmməd Əl-Quraşi səfər çərçivəsində lazımi materiallar toplayaraq körfəz ölkələrinin dövlət qurumlarının abunəçisi olduğu “Əl-Diya” jurnalının bir nömrəsini məhz Azərbaycana həsr etmək istədiyini də bildirmişdir.
Ötən ilin yanvarında S.İmanovun Dubayın xeyriyyə məsələləri üzrə naziri doktor Həməd Əl-Şeybani ilə keçirilən görüşü də xatırlanmışdır. Bildirilmişdir ki, həmin görüşdən sonra qurum tərəfindən azərbaycanlı qaçqın və məcburi köçkünlərin ehtiyaclarının ödənilməsi məqsədi ilə bir sıra layihələrin həyata keçirilməsi üçün 1,2 milyon dollar yardım göstərilmişdir.
S.İmanov Məhəmməd Əl-Quraşiyə Heydər Əliyev Fondunun hazırladığı “Qarabağ həqiqətləri” toplusu, CD disklər, ərəb dilində “Erməni terroru” kitabı, “Erməni terrorunun qanlı izləri” kitabçası, ərəb dilində Qarabağ və İrəvan xanlıqlarının tarixi və mədəniyyətindən bəhs edən kitablar, Azərbaycan xəritəsi və Adil Abdullah Əl-Fəllahın ərəb dilində hazırladığı “Heydər Əliyev və milli-mənəvi dəyərlər” kitabını təqdim etmişdir.
Kitabların məzmunu ilə tanış olan Dubay əmirliyinin Alimlər Şurasının sədri ulu öndər Heydər Əliyevin görkəmli siyasətçi və dahi şəxsiyyət olduğunu qeyd etmişdir. Məhəmməd Əl-Quraşi Prezident İlham Əliyevin apardığı uğurlu xarici siyasətlə maraqlandığını və Azərbaycanın BMT Təhlükəsizlik Şurasının qeyri daimi üzvü seçilməsi barədə məlumatı olduğunu da bildirmişdir.
S.İmanov Xocalı soyqırımı ilə bağlı keçirdiyi silsilə tədbirlər çərçivəsində Dubayın Dövlət Aparatının ictimaiyyətlə əlaqələr idarəsinin rəisi Əhməd Əl-Zahid, onun müavini Məhəmməd Əl-Hüseyn Fəzai və idarənin digər əməkdaşları ilə də görüşlər keçirmişdir. Cəmiyyət sədri görüş iştirakçılarına Xocalı soyqırımı və Qarabağın tarixi barədə ətraflı məlumat vermiş və Azərbaycana qarşı əsassız ərazi iddiaları ilə çıxış edən Ermənistanın təcavüzü nəticəsində torpaqlarımızın 20 faizinin işğal olunduğunu bildirmişdir. O, 1992-ci il fevralın 25-dən 26-na keçən gecə ermənilər tərəfindən Azərbaycanın Xocalı şəhərində dinc sakinlərin vəhşicəsinə qətlə yetirildiklərini qeyd etmişdir. Bildirilmişdir ki, həmin tarix Azərbaycanda Xocalı soyqırımı və milli hüzn günü kimi qeyd olunur.
Dubayın Dövlət Aparatının ictimaiyyətlə əlaqələr idarəsinin rəisi Əhməd Əl-Zahid ədalətin öz yerini tutacağına əmin olduğunu vurğulamışdır.
S.İmanov görüş iştirakçılarına Azərbaycan tarixi və mədəniyyətindən bəhs edən ərəb dilində kitablar və Azərbaycan xəritəsi təqdim etmişdir.
Bölmənin digər xəbərləri
