BELARUS DÖVLƏT İQTİSAD UNİVERSİTETİNDƏ XOCALI SOYQIRIMI HAQQINDA HƏQİQƏLƏRİ ÖYRƏNMİŞLƏR
Minsk, 22 fevral (AZƏRTAC). “Xocalıya ədalət” beynəlxalq kampaniyası çərçivəsində Azərbaycan nümayəndə heyətinin Belarus Dövlət İqtisad Universitetinin rektorluğu və professor-müəllim heyəti ilə görüşü olmuşdur.
Görüşdə Azərbaycan tərəfini ölkəmizin Minskdəki səfirliyinin əməkdaşları - müşavir Asya Manafova, mətbuat katibi Esmira İsmayılova, habelə Milli Məclisin deputatı Gülər Əhmədova, Beynəlxalq Diaspor Mərkəzinin sədri İsmayıl Ağayev, onun müavini, politoloq, professor Vaqif Arzumanlı, Mərkəzin Şərqi Avropa ölkələrindəki əlaqələndiricisi Azər Kərimov təmsil etmişlər.
Tərəflər iki ölkə arasında sıx əməkdaşlıq imkanlarını, tələbə və müəllim mübadiləsi məsələlərini müzakirə etmişlər.
Xalqımızın tarixindən, Ermənistan-Azərbaycan, Dağlıq Qarabağ münaqişəsinin real faktlarından söz açan, bu münaqişənin ən qanlı faciəsi olan Xocalı soyqırımı üzərində ətraflı dayanan Milli Məclisin deputatı Gülər Əhmədovanın çıxışı Belarus tərəfinin böyük marağına səbəb olmuşdur. Deputat Belarusun İkinci dünya müharibəsi illərində sakinləri ilə birlikdə yandırılmış Xatın kəndi və 1992-ci il fevralın 26-da erməni terrorçuları və onların əlaltıları tərəfindən Yer üzündən silinmiş Azərbaycanın Xocalı şəhəri arasında paralel aparmışdır.
Azərbaycan nümayəndə heyəti universitetin kitabxanasına Azərbaycan tarxinə dair kitablar və Heydər Əliyev Fondu tərəfindən təqdim olunmuş, xalqımızın erməni təcavüzkarlarına və işğalçılarına qarşı mübarizəsindən, Xocalı qətliamından söhbət açan mətbu məhsul və CD-lər bağışlamışdır.
Bölmənin digər xəbərləri
