BERLİNDƏ AZƏRBAYCANIN MİLLİ BAYRAMI – RESPUBLİKA GÜNÜ MÜNASİBƏTİLƏ QƏBUL

28.05.2004 [02:30]
Çap et
A⁺ A^-

AZƏRTAC-ın xüsusi müxbiri Berlindən xəbər verir ki,mayın 27-də ölkəmizin Almaniyadakı səfirliyi Azərbaycanın milli bayramı-Respublika Günü münasibətilə rəsmi qəbul təşkil etmişdir. Almaniya Federal Deputatlar Palatasının Berlindəki nümayəndəliyində keçirilən qəbulda bu ölkənin yüksək vəzifəli dövlət və hökumət nümayəndələri, Bundestaqın üzvləri, 40-dan artıq dövlətin Almaniyada akkreditə olunmuş səfirləri və konsulları, elm, təhsil və mədəniyyət xadimləri, bu ölkədə yaşayan, işləyən və təhsil alan soydaşlarımız iştirak etmişdir.

Azərbaycanın Almaniyadakı səfiri Hüseynağa Sadıqov milli bayramımızı təbrik etməyə gəlmiş 200-dən artıq qonağı qarşılayaraq, onların təbriklərini dinləmiş və salona dəvət etmişdir.

Səfir qonaqları salamlayaraq, onlara ölkəmizin müstəqillik tarixindən, Vətənimzin suveren dövlət kimi inkişafından, dünya dövlətləri arasında mövqeyindən və günü-gündən artan beynəlxalq nüfuzundan danışmışdır. Səfir Almaniya-Azərbaycan münasibətlərinə toxunaraq bildirmişdir ki, bu dostluq münasibətləri qədim tarixə malikdir. Almaniya ölkəmizin müstəqilliyini tanıyan ilk dövlətlərdəndir. 1996-cı ilin iyununda Azərbaycan Prezidenti Heydər Əliyevin Almaniyaya rəsmi dövlət səfərindən sonra iki dövlət arasında əlaqələr daha sürətlə inkişaf etməyə başlamışdır. Səfir böyük əminliklə vurğulamışdır ki, ölkəmizin yeni Prezidenti İlham Əliyevin fəaliyyəti dövründə də Almaniya-Azərbaycan münasibətləri genişlənəcək və inkişaf edəcəkdir.

Bayram mərasimi Almaniyada yaşayıb-yaradan soydaşımız, bəstəkar - orqançı, Yohan Sebastian Bax mükafatı laureatı Arif Mirzəyevin konsert proqramı ilə davam etmişdir.

BERLİNDƏ AZƏRBAYCANIN MİLLİ BAYRAMI – RESPUBLİKA GÜNÜ MÜNASİBƏTİLƏ QƏBUL

MÜƏLLİFLƏ ƏLAQƏ

Bölmənin digər xəbərləri