BEYNƏLXALQ EPİZOOTİK BÜRO BAKIDA SEMİNAR KEÇİRİR
Ümumi iclasdan əvvəl seminar iştirakçıları - BEB, Avropa Birliyi və Avropa Komissiyasının təmsilçiləri, respublikanın şəhər və rayonlarının baytarlıq xidməti idarələrinin rəhbərləri, İqtisadi İnkişaf, Səhiyyə, Ekologiya və Təbii Sərvətlər nazirliklərinin, Dövlət Gömrük Komitəsinin, Dövlət Sərhəd Xidmətinin, Standartlaşdırma, Metrologiya və Patent üzrə Dövlət Agentliyinin nümayəndələri, baytarlıq sahəsi üzrə alim və mütəxəssislər Fəxri xiyabana gələrək ümummilli lider Heydər Əliyevin xatirəsini ehtiramla anmış, məzarı önünə əklil qoymuşlar. Onlar görkəmli oftalmoloq alim, akademik Zərifə xanım Əliyevanın da məzarı üstünə tər çiçəklər düzmüşlər. Mərasim iştirakçıları oradan Şəhidlər xiyabanına gəlmiş, Azərbaycanın müstəqilliyi və ərazi bütövlüyü uğrunda mübarizədə canlarından keçmiş cəsur Vətən övladlarının məzarlarını ziyarət etmiş, “Əbədi məşəl” abidəsinin önünə əklil qoymuşlar.
Sonra seminar işini davam etdirmişdir. BEB-in baş direktoru və regional təmsilçisi Nikola Belev seminarı açaraq tədbirin məqsədi barədə məlumat vermişdir.
Kənd təsərrüfatı naziri İsmət Abasov Azərbaycanda əsası ümummilli liderimiz Heydər Əliyev tərəfindən qoyulmuş aqrar strategiyanın ölkəmizin Prezidenti İlham Əliyev tərəfindən uğurla davam etydirildiyini, müstəqil ölkəmizin sosial və iqtisadi sahədə inamlı addımlar atdığını, sahibkarlığın inkişafı, sağlam rəqabətin formalaşması üçün münbit şərait yaradıldığını, makroiqtisadi sabitliyə nail olunmasını diqqətə çatdırmışdır. O, bütün sahələrdə olduğu kimi, baytarlıq xidməti sahəsində də əsaslı dönüş baş verdiyini, bu sistemin ümumdünya baytarlıq sisteminə inteqrasiyasını, beynəlxalq qurumlarla səmərəli əməkdaşlığını vurğulamış və müvafiq faktlar sadalamışdır. Qeyd etmişdir ki, bu uğurlarda Beynəlxalq Epizootik Büronun da rolu əvəzsizdir.
BEB-nin təmsilçisi Jan-Lyuk Anqot, Səhiyyə və İstehlakçıların Hüquqlarının Qorunması üzrə Avropa Komissiyasının (DG SANCO) nümayəndəsi Hovard Bato, Avropa Komissiyasının eksperti Jan Luis Dubi, Kənd Təsərrüfatında İnformasiya Mübadiləsi üzrə Texniki Yardım Proqramının mütəxəssisi Olqa Zorko BEB-nin strukturu, məqsədləri, qurumun DG SANCO ilə əməkdaşlığı, baytarlıq xidmətlərinin məqsəd və fəaliyyətinin müəyyənləşdirilməsi, həyata keçirilməsi, Avropa İttifaqında baytarlığa dair təhsil proqramı və digər məsələlər barədə danışmışlar.
Dövlət Baytarlıq Xidmətinin rəisi İsmayıl Həsənovun dövlət və özəl baytarlıq xidmətlərinin fəaliyyəti, əlaqələri, 2007-2010-cu illər üçün proqnozlaşdırılan strukturu, məsuliyyəti, təcrübəsi, həyata keçirəcəyi tədbirlərin əsas istiqamətləri haqqında söz açmışdır. Rəisin ölkədə heyvanların miqdarı, 11 yoluxucu xəstəliyə (dabaq, qaramalın taunu, quduzluq, qoyunların çiçəyi, brusellyoz, manqo və s.) qarşı mübarizədə dövlətin yardımı, epizootik vəziyyət, nyukasl xəstəliyi, “quş qripi”, vaksinlərlə təchizat, brusellyozla mübarizədə strateji istiqamətlər və s. barədə məlumatları maraqla dinlənilmişdir.
İ.Həsənov məlumat vermişdir ki, 2006-cı ilin əvvəllərində ev və çöl quşlarında nyukasl xəstəliyi qeydə alınmışdı. Natiq “quş qripi” ilə əlaqədar bildirmişdir ki, təxminən elə həmin müddətdə vəhşi quşların yoluxduğu 9 və ev quşlarının yoluxduğu 4 məkan aşkar edilmişdi. Hazırda respublikada “quş qripi” ilə əlaqədar vəziyyət sabitdir və yeni yoluxma məkanları müşahidə edilməmişdir. İ.Həsənov Azərbaycanda “quş qripi” ilə mübarizənin əsas strateji istiqamətləri, dövlət büdcəsindən köməklik, beynəlxalq təşkilatların yardımı barədə də ətraflı danışmışdır.
Seminar işini oktyabrın 7-də davam etdirəcəkdir.
Bölmənin digər xəbərləri
