BEYNƏLXALQ EPİZOOTİK BÜRONUN BAKI SEMİNARI BAŞA ÇATMIŞDIR
Səhiyyə və İstehlakçıların Hüquqlarının Qorunması üzrə Avropa Komissiyasının (DG SANCO) nümayəndəsi Hovard Bato heyvanlara və heyvan mənşəli məhsullara verilən baytarlıq sertifikatları, Avropa Komissiyasının mütəxəssisi Klaas Stejin AB-nin heyvanların sağlamlığının qorunması, kompensasiyanın verilməsi və xəstə heyvanların məhv edilməsinə dair konsepsiyası, onun həmkarı Jorgen Versterqard AB-yə və BEB-in Regional Komissiyasına üzv olan dövlətlər arasında heyvan və heyvan mənşəli məhsulların idxal və ixrac prosedurunun tənzimlənməsi, BEB-in təmsilçisi Jan-Lyuk AB və BEB-in ictimai sağlamlığın qorunması aspektləri və zoonozlar haqqında söhbət açmış, bu sahələrdə müxtəlif ölkələrin təcrübəsindən danışmışlar.
Seminar iştirakçılarını maraqlandıran suallara cavab verilmiş, geniş fikir mübadiləsi aparılmışdır.
Bununla da seminar öz işini başa çatdırmışdır.
Dövlət Baytarlıq xidmətinin rəisi İsmayıl Həsənov müxbirimizə demişdir ki, Beynəlxalq Epizootik Büronun ikigünlük seminarında ölkələr arasında epizootik vəziyyət öyrənildi, qarşılıqlı yardımlar barədə fikir mübadiləsi aparıldı. Müxtəlif ölkələrin təmsilçilərinin yoluxucu xəstəliklər və onların porofilaktikası, heyvan sağlamlığının qorunmasına dair yeni informasiya sisteminin yaranması, heyvan mənşəli məhsullara sertifikatlar verilməsi və s. barədə məruzələri böyük maraqla dinlənildi. Seminarın canlı dialoq şəklində təşkili mütəxəssislərimizə maraqlandığı məsələlər barədə ətraflı məlumat almaq imkanı verdi. Düşünürəm ki, xüsusilə şəhər və rayonlarımızın baytarlıq idarələrinin mütəxəssisləri tədbirdən əməli fayda götürdülər, lazımi məlumatlar əldə etdilər. İnanıram ki, onlar aldıqları bilkləri fəaliyyətlərində bacarıqla tətbiq edəcəklər. Biz də öz növbəmizdə seminarın materiallarını, burada irəli sürülmüş tövsiyələri Azərbaycan dilinə çevirib disklərə köçürəcək və yerlərə çatdıracağıq. Tədbirin keçirilməsinə hərtərəfli şərait yaradıldığına görə hökumətə, Kənd Təsərrüfatı Nazirliyinə minnətdarıq. Yeri gəlmişkən, nazir İsmət Abasov, Nazirlər Kabinetinin şöbə müdiri Rüfət Əsədov, Baş nazirin müşaviri Musa Məmmədov seminarin işində yaxından iştirak etdilər.
Bölmənin digər xəbərləri
