BEYNƏLXALQ KONFRANS ÖZ İŞİNƏ BAŞLAMIŞDIR
Açılışdan əvvəl konfrans iştirakçıları Azərbaycan xalqının dahi oğlu, ümummilli lider Prezident Heydər Əliyevin əziz xatirəsini bir dəqiqəlik sükutla yad etdilər.
Azərbaycan Respublikası Baş nazirinin müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının sədri Əli Həsənov konfransı açaraq, qonaqları salamladı, bu mötəbər tədbirin keçirilməsində respublikamıza göstərdiyi etimada və köməyə görə Dünya Gömrük Təşkilatının baş katibi Mişel Daneyə, eləcə də digər iştirakçılara Azərbaycan hökuməti adından minnətdarlığını bildirdi. O, müasir dünyamızda narkomaniya və narkotik vasitələrin qanunsuz dövriyyəsinin genişlənməsini XXI əsrin bəşəriyyət üçün ən ciddi və ağrılı problemlərdən olduğunu, qlobal təhlükə xarakteri almış bu bəla ilə səmərəli mübarizənin yalnız bütün ölkələrin və beynəlxalq təşkilatların birgə fəaliyyəti nəticəsində mümkünlüyünü vurğuladı. Baş nazirin müavini Azərbaycan Respublikasının bu sahədə bütün beynəlxalq Konvensiyalara və sənədlərə qoşulduğunu və narkotiklərlə mübarizədə üzərinə düşən öhdəlikləri layiqincə yerinə yetirdiyini söylədi.
Ə.Həsənov xatırlatdı ki, xalqımızın ümummilli lideri Heydər Əliyev Azərbaycanda narkotik vasitələrin qanunsuz dövriyyəsinə qarşı mübarizəyə ümumdövlət vəzifəsi kimi baxırdı: “Biz narkomaniyanı, narkotik maddələrdən qanunsuz istifadə olunmasını, onların ölkəmizdə yayılmasını cəmiyyətimizin, xalqımızın bu günü və gələcəyi üçün təhlükə hesab edirik. Ona görə də bunlara qarşı mübarizəni dövlət orqanlarının əsas vəzifələrindən biri sayıram”.
Məhz bu vəzifənin səmərəli şəkildə yerinə yetirilməsi məqsədi ilə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası yaradılmışdır. Ə.Həsənov bildirdi ki, respublikamızda narkotiklərlə mübarizənin təşkilati, hüquqi, sosial və digər aspektlərini əhatə edən 2-ci Ümummilli Proqramın uğurla həyata keçirilməsinə başlanmışdır. Respublikamızın əlverişli coğrafi mövqeyini, o cümlədən Böyük İpək Yolunun üzərində yerləşməsini xatırladan Baş nazirin müavini ərazimizin tranzit məntəqə kimi istifadəsinə imkan verilməməsindən ötrü mübarizənin daha da gücləndirilməsinin zəruriliyindən danışarkən, Ermənistan tərəfindən Azərbaycan torpaqlarımızın 20 faizinin zəbt edildiyini və həmin nəzarətsiz ərazilərdən narkotik bitkilərin yetişdirilməsi və narkotik vasitələrin tranziti üçün istifadə olunduğunu vurğuladı.
Sonra Prezidentin İcra Aparatının Hüquq mühafizə orqanları ilə iş şöbəsinin müdiri Fuad Ələsgərov Azərbaycan Respublikasının Prezidenti İlham Əliyevin beynəlxalq konfransın iştirakçılarına təbrikini oxudu (təbrikin mətni qəzetin 22 yanvar nömrəsində dərc olunmuşdur).
Dövlət Gömrük Komitəsinin sədri Kəmaləddin Heydərov çıxışında Dünya Gömrük Təşkilatının baş katibi Mişel Daneyə, eləcə də bu nüfuzlu beynəlxalq konfransın bütün iştirakçılarına və qonaqlara minnətdarlıq etdi. O dedi ki, beynəlxalq təşkilatların və Böyük İpək Yolu dövlətləri gömrük xidmətləri nümayəndələrinin konfransda fəal iştirak etməsi müzakirə olunan məsələlərin vacibliyini, habelə iştirakçıların ümumbəşəri bəla olan narkotik vasitələrin qanunsuz dövriyyəsinə qarşı mübarizə əzmini bir daha sübut edir.
Komitənin sədri narkotiklərin yayılması və narkobiznesə qarşı mübarizənin Azərbaycanın dövlət orqanlarının da qarşısında duran əsas vəzifələrdən olduğunu vurğuladı, narkotiklərə qarşı mübarizə üzrə Milli Proqramla və beynəlxalq öhdəliklərlə üzərinə düşən vəzifələri Azərbaycan hökumətinin müvəffəqiyyətlə yerinə yetirdiyini, bu istiqamətdə bir sıra məqsədyönlü tədbirlərin həyata keçirdiyini diqqətə çatdırdı. Respublikamızın gömrük orqanlarının müasir texniki nəzarət və nəqliyyat vasitələri ilə təchiz olunması, qabaqcıl dövlətlərin gömrük orqanlarının təcrübəsinin öyrənilməsi və tətbiqi, müasir texnologiyalara əsaslanan məlumat sisteminin formalaşdırılması, peşəkar gömrükçülərin hazırlığı məqsədi ilə seminarların keçirilməsi, dünya standartlarına cavab verən Regional tədris mərkəzinin və Kinoloji mərkəzin istifadəyə verilməsi, təhqiqat və istintaq strukturlarının gücləndirilməsi bu tədbirlərin bir hissəsidir.
Bu işdə Dövlət Gömrük Komitəsi ikitərəfli, regional və beynəlxalq əməkdaşlığa böyük əhəmiyyət verir. Komitənin sədri Bakıda keçirilən konfransın Böyük İpək Yolu dövlətlərinin gömrük xidmətləri və beynəlxalq təşkilatlar arasında geniş fikir mübadiləsi aparılmasında, qabaqcıl təcrübənin öyrənilməsində, faydalı əməkdaşlığın yüksəldilməsində öz bəhrəsini verəcəyinə əmin olduğunu bildirdi.
Sonra çıxış edən Dünya Gömrük Təşkilatının baş katibi Mişel Dane görkəmli siyasətçi və dövlət xadimi Prezident Heydər Əliyevin vəfatı ilə əlaqədar başçılıq etdiyi qurum adından bütün Azərbaycan xalqına başsağlığı verdi. Mişel Dane beynəlxalq konfransın iştirakçılarını təbrik edərək, əsrin bəlası olan narkomaniya ilə mübarizədə dövlətlərin və beynəlxalq təşkilatların birgə fəaliyyətinin əhəmiyyətini vurğuladı. Eyni zamanda, narkotiklərlə mübarizə sahəsində hələ də bir sıra çətinliklərin mövcudluğunu bildirdi.
Mişel Dane rəhbərlik etdiyi təşkilatın Azərbaycan Respublikasının Dövlət Gömrük Komitəsi ilə əməkdaşlığından məmnun qaldığını söylədi, bu istiqamətdə bir sıra birgə tədbirlərin həyata keçirildiyini xatırlatdı. O, Bakı konfransında faydalı təkliflərin səslənəcəyinə və konkret nəticələrin əldə ediləcəyinə ümidvar olduğunu bildirdi.
Sonra konfrans iştirakçıları xatirə şəkli çəkdirdilər.
Fasilədən sonra konfransda məruzələr dinlənildi, iştirakçılar Regional tədris mərkəzi və Kinoloji mərkəzlə tanış oldular.
Beynəlxalq konfrans yanvarın 23-də öz işini davam etdirəcəkdir.
Bölmənin digər xəbərləri
