BEYNƏLXALQ SİMPOZİUM ÖZ İŞİNİ BAŞA ÇATDIRMIŞDIR
AZƏRTAC-ın müxbiri xəbər verir ki, mayın 26-da Şəhriyar adına Bakı mədəniyyət mərkəzində simpoziumun rəsmi bağlanışına və Atatürk adına özəl türk litseyi məzunlarının buraxılış gününə həsr olunmuş ədəbi-bədii gecə keçirilmişdir. Mərasim açıq elan edildikdən sonra şəhidlərin ruhu bir dəqiqəlik sükutla yad edilmiş, Azərbaycanın və Türkiyənin dövlət himnləri səslənmişdir. Çıxış edənlər Türkiyə ilə Azərbaycan arasındakı sarsılmaz qardaşlıq və dostluq əlaqələrindən danışmış, simpozium iştirakçılarını və məzunları təbrik etmişlər.
Tədbirin təşkilatçıları - Azərbaycan Dövlət İqtisad Universiteti “Türk dünyası işlətmə” fakültəsi və Türk Dünyası Araşdırmalar Vəqfi tərəfindən Türkiyənin, eləcə də respublikamızın müxtəlif ali məktəbləri müəllimlərinə, simpoziumun keçirilməsinə kömək göstərmiş şəxslərə təşəkkürnamələr təqdim olunmuşdur.
Gecədə Atatürk adına özəl türk litseyi məzunları və şagirdləri türkçülüyə, azadlığa, qardaşlığa və vətənpərvərliyə həsr olunmuş şer və mahnılar oxumuş, tanınmış müğənnilər məzunları öz nəğmələri ilə təbrik etmişlər.
Bölmənin digər xəbərləri
