Bakı, 13 fevral, AZƏRTAC

Azərbaycan-Türkiyə birliyi tarixi sınaqlardan çıxan, möhkəm təməllər üzərində formalaşan qardaşlıq nümunəsidir. Bu gün olduğu kimi, 100 il əvvəl də ölkələrimiz dar gündə bir-birinin yanında olublar. Ümummilli Lider Heydər Əliyevin “Bir millət, iki dövlət” və Mustafa Kamal Atatürkün “sevinciniz sevincimiz, kədəriniz kədərimizdir” müdrik kəlamları tarixin çətin günlərində öz təsdiqini tapdı. Xalq şairi Bəxtiyar Vahabzadə “Azərbaycan-Türkiyə” şeirində

“Bir ananın iki oğlu

Bir ağacın iki qolu

O da ulu, bu da ulu

Azərbaycan-Türkiyə”

fikirlərini ifadə etməklə ölkələrimizin bir-birinə necə də yaxın olduğunu gözəl təsvir edib.

Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.

Onun fikirlərinə görə, son 32 il ərzində tarixi torpaqlarımızın erməni işğalında olması qardaşlığımızı bir daha sınağa çəkdi. Belə ki, Türkiyə ilk gündən Azərbaycan torpaqlarının işğalı yolverilməzdir deyərək yanımızda oldu. Qardaş ölkə iki il əvvəl Vətən müharibəsinin ilk günündə Prezident Rəcəb Tayyib Ərdoğanın “Hər cürə yardımla can Azərbaycanın yanındayıq“ fikirlərini bəyan etməsi ölkəmizə qarşı mənfi planlar quranların müdaxiləsinin qarşısını aldı. Azərbaycan öz ərazi bütövlüyünü təmin etdiyi iki ildən bir az çox müddətdə bu ərazilərimizdə bərpa-yenidənqurma işlərində Türkiyə yanımızda oldu və əsl qardaşlığını nümayiş etdirdi.

“Fevralın 6-da Türkiyənin 10 vilayətini əhatə edən dağıdıcı gücə malik zəlzələ qardaşlığımızın möhkəm olduğunu bir daha sınağa çəkdi. İlk andan Prezident İlham Əliyevin Türkiyə Prezidentinə zəng etməsi və türk xalqına başsağlığı verərək kədərimizin ifadə edilməsi, ehtiyacın olub-olmadığı soruşulmadan dərhal yardımların göndərilməsinə başlamağımız qardaş ölkədə baş vermiş zəlzələnin törətdiyi faciəni öz dərdimiz kimi qəbul etməyimizdən irəli gəlir. Bu yardım kampaniyasına ilk qoşulan Mehriban xanım Əliyevanın rəhbərlik etdiyi Heydər Əliyev Fondu oldu. Mehriban Əliyevanın öz şəxsi instaqram hesabında Türkiyədə baş vermiş təbii fəlakətdən kədərləndiyini ifadə edərək səsləndirdiyi fikirlər bir ananın, bacının öz doğmalarına necə də həssas yanaşdığının nümayişdir.

Mehriban xanım Əliyevanın müxtəlif ölkələrdə baş verən digər təbii fəlakətlərlə bağlı göndərdiyi humanitar yardımlar, fərqli din və mədəniyyətlərə aid məkanların bərpasında iştirak onun simasında yüksək mənəvi-əxlaqi dəyərlərə, milli təəssübkeşliyə malik, humanizm ideallarına sadiq Azərbaycan qadınının obrazını formalaşdırıb”, - deyə Azər Badamov vurğulayıb.

O əlavə edib ki, Heydər Əliyev Fondu və “PAŞA Holding”in Türkiyəyə yardım kampaniyasında məşəl olması xalqımızı da səfərbər etdi. Zəlzələnin baş verdiyi ilk gündən xalqımız milli birlik nümayiş etdirərək kimin nəyə imkanı çatırsa, Türkiyəyə göndərmək arzusu ilə müəyyən olunmuş yerlərə axın etdilər. Artıq hər gün avtomobil karvanları qardaş yardımları ilə zəlzələdən əziyyət çəkən türk qardaşlarımıza çatdırılır. Bu gün Azərbaycanda elə bir insan tapılmaz ki, Türkiyədə baş vermiş təbii fəlakətdən kədərlənməsin və öz dəstəyini ifadə etmək istəməsin. Bəli, bu gün xilasedicilərimiz də dağıntılar altından canlı və ya cansız insanların çıxarılmasında gecə-gündüz çalışırlar. Səhra xəstəxanalarında yaralılar qəbul edilir və ilkin yardımlar göstərilir. Xalqımız evsiz qalmış insanlara öz evlərində yer verməyə, çörəyini bölüşməyə hazır olduğunu bildirirlər. Təbii ki, bu, əsl qardaşlığın göstəricisidir. Bu gün xalqımızın Türkiyənin yanında olması həm də dünyaya bizim bir-birimizlə necə möhkəm bağlı olduğumuzu göstərir. Bəli, bu sınaqdan da xalqlarımız əl-ələ verərək çıxacaq. Dövlətlərimizin rəhbərliyi ilə xalqlarımız, sözün əsl mənasında, bir millət ifadəsini hər şeydən üstün tutaraq əsl qardaşlıq nümunəsi göstərirlər.