Bakı, 10 sentyabr, AZƏRTAC

"Çempionlar Liqasını qazanmaqla nələrə qadir olduğumuzu göstərdik".

AZƏRTAC xəbər verir ki, bu sözləri Polşanın paytaxtı Varşavada keçirilən minifutbol üzrə Çempionlar Liqasının qalibi olan "Birbaşa" komandasının üzvü Mirmehdi Rzayev jurnalistlərə açıqlamasında deyib.

O, birgə güc hesabına uğurlu nəticə qazandıqlarını bildirib: "Daha əvvəl iki dəfə qatıldığımız bu turnirdə finala vəsiqə qazana bilməmişdik. Lakin bu dəfə bacarıq. Səkkizdə bir finalda Azərbaycanın Çempionlar Liqasındakı digər təmsilçisi "Aznur"la qarşılaşdıq. İstəməzdik ki, onlarla erkən üz-üzə gələk. Çünki rəqib turnirə yaxşı hazırlaşmışdı. Növbəti yarışların da daha uğurlu keçəcəyinə inanıram".

Qeyd edək k, "Birbaşa" finalda Çexiyanın "Brno" kollektivinə 2:1 hesabı ilə qalib gələrək Çempionlar Liqasının qalibi olub.