BİRİNCİ AZƏRBAYCAN AFRİKA EKSPEDİSİYASI KİLİMANCARO DAĞINA DOĞRU YÜRÜŞƏ BAŞLAMIŞDIR
Bakı, 17 avqust (AZƏRTAC). Avqustun 11-də Bakıdan yola düşən Azərbaycan Hava və Ekstremal İdman Növləri Federasiyasının prezidenti Hüseynqulu Bağırovun başçılıq etdiyi birinci Azərbaycan Afrika ekspedisiyası Tanzaniyanın Aruşa şəhərindən Kilimancaro dağının Uhuru zirvəsinə istiqamət götürmüşdür. Ekspedisiya “Azərbaycan, yeni zirvələrə doğru İlhamla irəli” şüarı altında həyata keçirilir.
Qeyd edək ki, Kilimancaro Afrikanın ən hündür dağ massividir və Tanzaniyanın şimal-şərqində yerləşir. Uhuru zirvəsi (5895 metr) isə Kilimancaro dağındakı Kibo vulkanının ən hündür nöqtəsidir ki, bu da dünyanın ən yüksək “Yeddi zirvə”sindən biridir.
Elmi, siyası, idman və rəmzi əhəmiyyət daşıyan ekspedisiyanın tərkibində Ekologiya və Təbii Sərvətlər Nazirliyinin nümayəndələri də iştirak edirlər.
Xatırladaq ki, bu, Azərbaycan Hava və Ekstremal İdman Növləri Federasiyasının təşkil etdiyi ikinci uzaqməsafəli yürüşdür. Bundan əvvəl Azərbaycan Hava və Ekstremal İdman Növləri Federasiyasının prezidenti H.Bağırovun başçılıq etdiyi ekspedisiya qrupu ötən ildə Antarktidaya yürüş etmişdir.
Bölmənin digər xəbərləri
