“Biz mübarizlərik” filmi nümayiş etdirilmişdir
Bakı, 21 fevral (AZƏRTAC). Fevralın 21-də Cəfər Cabbarlı adına Azərbaycan Dövlət Teatr Muzeyində Xocalı soyqırımının 19-cu ildönümü ilə bağlı keçirilən tədbirdə Vətən uğrunda canlarını qurban vermiş şəhidlərimizin xatirəsi bir dəqiqəlik sükutla yad edilmişdir.
AZƏRTAC xəbər verir ki, muzeyin elmi işlər üzrə direktor müavini Sevinc Mikayılova tədbiri açaraq 1992-ci il fevralın 25-dən 26-na keçən gecə ermənilərin havadarlarının köməyi ilə Xocalıda törətdikləri vəhşiliklər barədə danışmışdır.
Azərbaycanın ilk hərbi operatoru, ehtiyatda olan polkovnik-leytenant Seyidağa Mövsümov, Qarabağ müharibəsi veteranı Şamil Sabiroğlu, Milli Qəhrəman Füzuli Rüstəmovun bacısı, eləcə də xocalılar faciə ilə bağlı fikirlərini bildirmiş, erməni qəddarlığını diqqətə çatdırmışlar.
Məktəblilər Xocalıya həsr olunmuş şeirlər söyləmişlər. “Günay” Uşaq Teatrı və “Aytam” Uşaqların Mədəni-Maarif İctimai Birliyinin şagirdləri Zərəngiz Dəmirçi Qayalının “Cavab ver” poeması əsasında hazırladıqları tamaşadan səhnəciklər göstərmişlər.
Tədbirdə Azərbaycanın Milli Qəhrəmanı Mübariz İbrahimova və “İgidliyə görə” medalına layiq görülmüş Fərid Əhmədova həsr olunmuş “Biz mübarizlərik” filmi nümayiş etdirilmişdir. Filmin ssenari müəllifi və rejissoru “Əməkdar İncəsənət Xadimi”, polkovnik Abdulla Qurbanidir.
Bölmənin digər xəbərləri
