BMT FİL SÜMÜYÜ İXRACINA QADAĞA QOYUR

07.10.2006 [13:39]
Çap et
A⁺ A^-

AZƏRTAC “Novosti” agentliyinə istinadla xəbər verir ki, oktyabrın 5-də Birləşmiş Millətlər Təşkilatı fil sümüyü ixracının dayandırılması haqqında qərar vermişdir. Təşkilatın qərarı fillərin populyasiyasının azalması ilə əsaslandırılır.

BMT-nin mətbuat üçün sənədində bildirilir: “Oktyabrın 6-da BMT-nin heyvanların nadir növləri ilə ticarətə dair Beynəlxalq Konvensiya kifayət qədər nəzarət sisteminin yoxluğu üzündən Botsvana, Namibiya və Cənubi Afrikadan 60 ton fil sümüyü ixracını dayandırmışdır”.

Beynəlxalq fil sümüyü ticarətinə qadağa 1989-ci ildə tətbiq olunmuşdur.

2004-ci ildə BMT-nin bu qadağanı yumşaltması hökumət orqanları tərəfindən sərt nəzarət qoyulması şərti ilə həmin Afrika dövlətlərinin iqtisadiyyatlarına dəstək vermək zərurətindən irəli gəlmişdir.

Fil sümüyü ixracına BMT-nin qoyduğu norma Cənubi Afrika üçün 30 ton, Botsvana üçün 20 və Namibiya üçün 10 ton olmuşdur.

İki il öncə fil dişi ticarətinə qadağanın yumşaldılması haqqında BMT-nin qərarı “yaşıllar”ın mənfi reaksiyasına səbəb olmuşdur. Onlar bildirirlər ki, bu cür biznesin leqallaşdırılması nadir heyvanların qırılmasına gətirib çıxarar.

Son iyirmi il ərzində Afrika populyasiyalı fillərin sayı 1,3 milyondan 300-450 minədək azalmışdır.