Bodrum – türk Rivierasının qoynunda
Bakı, 29 dekabr, AZƏRTAC
Qədim Halikarnasın varisi olan Bodrum hazırda Türkiyənin ən nüfuzlu kurortu kimi unudulmaz istirahət üçün hər cür şəraitə malikdir. Onun iynəyarpaqlı və zeytun ağaclarından ibarət meşələrlə əhatə olunmuş saysız-hesabsız bəyaz çimərlikləri, qədim memarlıq şedevrləri və rəngarəng ənənəvi bazarları ən çox səyahət etmiş insanlarda da yeni təəssüratlar yaradır. Aktiv istirahət həvəskarları su əyləncələrinin geniş çeşidi və kurortun çılğın gecə həyatını qiymətləndirəcək, sakit istirahət pərəstişkarları isə Egey dənizi dalğalarının ecazkar səsinin eşidildiyi kölgəli xiyabanlarda gəzintidən zövq alacaqlar.
Mindos darvazaları və gecə həyatı
Bodrumun ən görməli yerini - Halikarnas mavzoleyinin xarabalıqlarını gördükdən sonra Karyalı Mavzolun hakimiyyəti dövrünə (eramızdan əvvəl 377-353-cü illər) aid digər qədim abidəni - amfiteatrı da görməlisiniz. Bu klassik antik teatr 13 min tamaşaçı tutur və şəhərin əvəzolunmaz panoramının göründüyü yüksəklikdə yerləşir. Tamaşaçı yeri və ikiyaruslu səhnələrdən başqa, amfiteatrda o zamanın demək olar ki, bütün tamaşalarında yer alan xor üçün meydança da var. Maraqlıdır ki, səhnənin arxasındakı divarlarda dekorasiyaların asılması üçün yerlərin izləri indi də qalır. Lakin amfiteatr heç də həmişə Melpomenaya ibadət yeri olmayıb. Sonrakı illərdə, romalıların hakimiyyəti zamanında bu meydança qanlı qladiator döyüşlərinin keçirilməsi üçün istifadə olunub. Bir müddət əvvəl qədim Halikarnas teatrı əsaslı təmir edilib. Antik incəsənətin bu gözəl abidəsi Anadolunun ən qədim teatrlarından biri kimi diqqətəlayiqdir.
Diqqət çəkən digər abidə Gümüşlük adlanan və antik dövrdə Karyanın Mindos şəhərinin eramızdan əvvəl 364-cü ildə Mavzolun zamanında tikilmiş və bu yaxınlarda bərpa olunmuş qədim qərb darvazalarıdır. Bu darvazalar Makedoniyalı İsgəndərin qoşunları tərəfindən Halikarnasın mühasirəsi zamanı baş vermiş qanlı döyüşlərə səhnə olub. Məğlubedilməz sərkərdə səyyar taxta qüllələrin və mühasirə katapultlarının köməyi ilə dörd qüllədən ibarət Mindos darvazalarına hücum edərək karyalıların mühasirəsini yarmağa cəhd edib.
Bodrumun gözəlliyi ondadır ki, tarixə ekskursiyanı müasir həyatın gecə-gündüz qaynayan zövqləri ilə asanlıqla uzlaşdırmaq olar. Gecə həyatının mərkəzi olan İstanbuldan sonra Bodrumun ikinci şəhər kimi şöhrətini saxlayan klublar, kafelər və restoranlar səhərədək açıqdır. Bodrum kafelərinin gözəlliyi ondadır ki, onların bir çoxu dəniz sahilində yerləşir və işıqlandırılan sahil zolağı, Bodrum qalasının əzəmətli görünüşü qonaqların gözləri önündə olur. Burada dəniz sahili boyunca uzanan küçənin bir hissəsi hətta Bar-strit adlanır ki, şəhərin ən qədim əyləncə məkanı olan Vəli-bar da bu ərazidədir. M&M Dancing əyləncə məkanı isə ən yaxşı diskoteka və tərtibatı ilə seçilir. Fasil Cafe Rasit barının müştəriləri türkü və oriental rəqs həvəskarlarının sevimli yeridir. Əlbəttə, dünyanın ən gözəl diskotekalarından biri olan və 1979-cu ildən fəaliyyət göstərən Halikarnas Disco da diqqətdən kənarda qala bilməz. Bodrumun gecə həyatının bu pioneri yerləşdiyi gözəl məkan, dəbdəbəli atmosferi, dünya səviyyəli şou və birinci dərəcəli xidməti ilə şöhrət qazanıb. Dünyanın bir çox yerindən Bodruma gəlmiş məşhur diceylər və ifaçılar məhz Halikarnasda çıxış edirlər.
Yola çıxmazdan əvvəl şopinq
Hər bir turist şəhərini tərk etməzdən əvvəl, mənalı istirahətinizi xatırladacaq ab-havanın bir hissəsini özünlə aparmaq istəyirsən. Bodrumun memarlıq tərzi - ağardılmış və pəncərələri tünd göy rəngində çərçivələnmiş, çəhrayı və bənövşəyi buqenvilleyalarla bəzədilmiş evlər çoxdan bu şəhərin rəmzinə çevrilib. Küçələrdə dolaşarkən, siz əsl Bodrum palitrasına uyğun hazırlanmış suvenirlər, rəsmlər və məişət əşyaları təklif edən mağazalara rast gələcəksiniz. Şəhərin daha bir qeyri-adi rəmzi hər zaman ziyarətçilər üçün açıq olan külək dəyirmanlarıdır. XVIII əsrə aid bu özünəməxsus tikililər ötən əsrin ikinci yarısınadək öz təyinatı üzrə - taxıl üyütmək üçün istifadə olunurdu. İndi bir çoxu bərpa olunmuş dəyirmanlarda restoranlar və müşahidə meydançaları yerləşir. Müxtəlif miniatür külək dəyirmanları isə suvenirlər və bağ sahələri, interyerlərin bəzədilməsi üçün əşya kimi təklif edilir.
Bodrum öz yaraşıqlı səndəlləri ilə də məşhurdur. Bütün yaşdan olanlar üçün bu yay ayaqqabılarının geniş çeşidi şəhərin kiçik mağazalarında və emalatxanalarında əl əməyi ilə hazırlanıb satılır.
Ənənəvi malların geniş çeşidi ilə tanış olmaq üçün səyahətçilər Bodrumun ilboyu fəaliyyət göstərən ən məşhur İkinci əl bazarına yollanır. Burada hər zaman böyük qələbəlik var, istər yerli sakinlər, istərsə də turistlər bazarın parlaq rəngləri və ləzzətli qoxularından zövq alır. İkinci əl bazarı bütün zövqlərə və cibə uyğun heyranedici naxışları və rəng çaları olan toxuculuq malları ilə məşhurdur. Parçalarla yanaşı, burada ənənəvi xalçalar, kilimlər, qab-qacaq, paltar, ədviyyat, şirniyyat və bir çox digər mallar təklif edilir.
Bodrumda vaxt sürətlə ötüb keçir. Bir səfər müddətində onun bütün gözəlliklərindən zövq almaq mümkün deyil. Bu kurort şəhərində hər şeyi unudur, mənalı istirahət əhval-ruhiyyəsinə təslim olursan.
Davamı, əvvəli ilə bu linkdə tanış ola bilərsiniz
https://azertag.az/xeber/Bodrum___qedim_Halikarnasin_varisi-1124046
Bölmənin digər xəbərləri
