“bp AZƏRBAYCAN” ŞİRKƏTİNİN PREZİDENTİ CARİ İLƏ YEKUN VURMUŞDUR
“bp Azərbaycan” şirkətinin prezidenti Devid Vudvord ilin yekunlarına dair keçirdiyi mətbuat konfransında bildirmişdir ki, 2002-ci il ərzində Azəri-Çıraq-Günəşli (AÇG) layihəsi çərçivəsində təhlükəsizlik texnikası üzrə göstəricilər yüksək səviyyədə olmuşdur. Qəza nəticəsində cəmi bir iş günü itirilmişdir. Şirkət 2001-ci ilin avqustunda (Mərkəzi Azəri) və 2002-ci ilin sentyabrında (Şərqi və Qərbi Azəri) sanksiya verilmiş “Azəri” layihəsi çərçivəsində başlanmış tikintinin əvvəlindən bu yüksək göstəriciləri saxlamaq məqsədi ilə bütün podratçılarla sıx əməkdaşlıq edir.
Devid Vudvord vurğulamışdır ki, hasilat üzrə göstəricilər də çox yaxşıdır. “Çıraq” yatağından ilkin neftin çıxarıldığı 1997-ci ilin noyabrından bəri, ümumən, 23,9 milyon ton neft hasil edilmişdir. Supsadan neft ixracı cədvəl üzrə davam edir. Bu da AMOK üzrə tərəfdaşların, habelə Azərbaycan tərəfinin cari ildə həmin limandan 5,65 milyon ton neft, o cümlədən 2,9 milyon ton mənfəət nefti yola salmasına imkan vermişdir.
Həmin dövrdə ARDNŞ-ın hasil etdiyi neft də daxil olmaqla, 2,3 milyon ton neft Bakı-Novorossiysk boru kəməri vasitəsilə nəql edilmişdir.
bp prezidentinin sözlərinə görə, cari ilin sonunadək əməliyyat xərcləri 2002-ci il üçün nəzərdə tutulan 92 milyon dollar əvəzinə, 88 milyon dollar, əsaslı xərclər isə bu il üçün nəzərdə tutulan 1,151 milyard dollar əvəzinə 1,172 milyard dollar olacaqdır.
“Çıraq” platformasındakı və Qərb ixrac boru kəmərindəki neft-qaz obyektlərinin gücləndirilməsi nəticəsində “Azəri-Çıraq-Günəşli” yataqlarında hasilat artmışdır. Bu il “Çıraq” platformasında gündəlik hasilat orta hesabla nəzərdə tutulan 127 min barrel əvəzinə, 128 min barrel olmuşdur.
“Faza- 1” və ”Faza-2” layihələri çərçivəsində tikintini daha səmərəli və optimal yolla başa çatdırmaq üçün Qərbi və Şərqi Azəri layihələri təsdiq olunduqdan sonra şirkət onları birləşdirməyi qərara almışdır. “Azəri” layihəsi çərçivəsində tikinti uğurla davam edir. Layihə cədvəl üzrə həyata keçirilir və bu ilin sonunadək “Faza-1” üzrə işlərin 50 faizi başa çatdirilacaqdır. Hazırda tikinti işlərində 3500 Azərbaycan vətəndaşı çalışır və getdikcə bu rəqəmi 5 minə çatdırmaq nəzərdə tutulmuşdur. Tikintidə 30-dan çox yerli şirkət iştirak edir.
Bölmənin digər xəbərləri
