BRİTANİYA REJİSSORU ANDREY ARŞAVİN HAQQINDA FİLM ÇƏKMƏK FİKRİNDƏDİR
Bakı, 19 avqust (AZƏRTAC). Rusiya futbol yığmasının kapitanı və İngiltərənin “Arsenal” komandasının hücumçusu Andrey Arşavin tezliklə özünü aktyor kimi də sınayacaqdır.
Müğənni Madonnanın keçmiş əri və məşhur Britaniya rejissoru Qay Riçi (“Kart oyunu, pullar, iki lülə”, “Böyük qazanc”) Rusiya yığmasının liderinin “Arsenal”a keçməsinin tarixçəsindən bəhs edən film çəkmək və Arşavinə çəkilişlərdə iştirak etməyi təklif etmək fikrindədir.
28 yaşlı rusiyalı futbolçuya buna görə təxminən 3 milyon avro təklif olunur. Halbuki Arşavin filmdə yalnız epizodik rolda çəkiləcəkdir. Futbolçunun gərgin iş qrafiki, həftədə iki dəfə oyunlarda iştirak etməsi ona filmin əsas qəhrəmanı rolunda çıxış etməyə imkan vermir.
Yaxın vaxtlarda Rusiyanın ən məşhur futbolçusunun kəşməkəşli taleyi barədə kitab da buraxılacaqdır. Ehtimal ki, Qay Riçinin yeni filminin ssenarisinin əsasını da elə bu kitab təşkil edəcəkdir.
Bölmənin digər xəbərləri
