Bu gün Azərbaycan müstəqillik yolunda daha əzmlə, daha inamla addımlayır ŞƏRH
Bakı, 28 may, AZƏRTAC
1918-ci il mayın 28-də xalqımız öz tarixinə, kimliyinə və milli dəyərlərinə əsaslanaraq, dünyanın o dövrdəki mürəkkəb siyasi mənzərəsi fonunda əlamətdar bir hadisəyə imza atdı – Azərbaycan Xalq Cümhuriyyətini yaratdı. Bu, təkcə müstəqil bir dövlətin elan olunması deyildi, həm də azərbaycançılıq ideologiyasının, xalq hakimiyyətinin, hüquqi və demokratik prinsiplərin konkret və real ifadəsi idi.
Azərbaycan Xalq Cümhuriyyəti xalqımızın qədim dövlətçilik ənənələrinin, milli oyanış və maarifçilik hərəkatlarının, Avropa və Şərq dəyərlərinin vəhdətində formalaşmış mükəmməl bir siyasi təşəbbüs idi. O dövrdə baş verən geosiyasi dəyişikliklər, çar Rusiyasının süqutu və imperiyaların dağılması fonunda Azərbaycan xalqı öz müqəddəratını təyin etmək üçün əsl iradə və cəsarət nümayiş etdirdi.
Bunu AZƏRTAC-a açıqlamasında Milli Məclisin deputatı Vüqar İskəndərov deyib.
O qeyd edib ki, cəmi 23 ay mövcud olmasına baxmayaraq, Azərbaycan Xalq Cümhuriyyəti dərin mənalı, çoxşaxəli islahatlar həyata keçirməklə, qısa zamanda güclü dövlətçilik təməlləri formalaşdırdı: “Hökumətin həyata keçirdiyi əsas addımlar arasında aşağıdakıları xüsusilə vurğulamaq lazımdır:
Azərbaycan dili dövlət dili elan edildi;
Qadınlara seçki hüququ verildi – bu, o dövr üçün təkcə Şərq deyil, Avropa ölkələrinin bir çoxu üçün də nümunəvi bir addım idi;
Təhsil, mətbuat və maarif sahələrində ciddi inkişaf strategiyaları həyata keçirildi;
Milli ordu yaradıldı, təhlükəsizlik və müdafiə sahəsində müstəqil strukturlar formalaşdırıldı;
Etnik və dini mənsubiyyətindən asılı olmayaraq bütün vətəndaşların hüquq bərabərliyi tanındı;
Xarici əlaqələrin qurulması istiqamətində ilk diplomatik addımlar atıldı, müstəqillik beynəlxalq ictimaiyyətə bəyan edildi.
Azərbaycan Xalq Cümhuriyyəti Avropa demokratiyasını və Şərq mədəniyyətini özündə birləşdirən bir model kimi formalaşaraq, regionda yeni bir idarəetmə nümunəsi yaratdı”.
Cümhuriyyətin ömrü uzun olmadığını xatırladan deputat bildirib ki, 1920-ci ilin aprelində bolşevik işğalı ilə Azərbaycanın dövlət müstəqilliyi əlindən alındı. Lakin Cümhuriyyət ideyaları xalqın ruhunda yaşayırdı. Sovet dövründə belə, xalq öz milli kimliyini və azadlıq arzusunu qəlbində yaşatdı. Bu ruhun sönməməsində ədəbiyyatın, incəsənətin, elm adamlarının və maarifçilərin rolu danılmazdır. Müstəqillik arzusu nəhayət XX əsrin sonlarında yenidən gerçək oldu. 1991-ci ildə SSRİ-nin süqutu fonunda Azərbaycan yenidən dövlət müstəqilliyini bərpa etdi. Lakin müstəqillik əldə olunanda ölkə çox ağır vəziyyətdə idi – siyasi qeyri-sabitlik, iqtisadi çöküş, Ermənistanın işğalçılıq siyasəti və daxili çəkişmələr müstəqil dövlətin taleyini sual altına qoymuşdu.
Vüqar İskəndərov əlavə edib ki, belə bir kritik məqamda xalqın istəyi ilə siyasi hakimiyyətə qayıdan Ulu Öndər Heydər Əliyev müasir Azərbaycan dövlətçiliyinin əsasını qoydu. Onun uzaqgörən siyasəti nəticəsində ölkədə sabitlik və inkişaf dövrü başladı. Məhz bu sabitlik nəticəsində Azərbaycan öz müstəqilliyini qoruyub saxlaya və onu inkişaf etdirə bildi. Ümummilli Lider Heydər Əliyev Azərbaycanın tarixində yalnız siyasi lider deyil, həm də dövlət quruculuğunun banisi kimi yer aldı. O, dəfələrlə bəyan edirdi ki, Azərbaycan Xalq Cümhuriyyəti xalqımızın tarixində ən parlaq səhifələrdən biridir və biz bu irsin davamçıları olaraq ona sahib çıxmalıyıq.
“Bu gün Prezident İlham Əliyevin rəhbərliyi ilə Azərbaycan müstəqillik yolunda daha əzmlə, daha inamla addımlayır. 2020-ci ildə 44 günlük Vətən müharibəsində əldə etdiyimiz şanlı Qələbə Azərbaycan xalqının, onun liderinin və ordusunun birliyinin, Cümhuriyyətin ideallarına sədaqətin bariz nümunəsi oldu. Qarabağın işğaldan azad olunması ilə Azərbaycan təkcə ərazi bütövlüyünü deyil, həm də tarixi ədaləti bərpa etdi. İşğaldan azad olunmuş torpaqlarda aparılan bərpa-quruculuq işləri dövlətin gücünün və iradəsinin göstəricisidir. Bu gün artıq o bölgələrdə üçrəngli bayrağımız dalğalanır. Bu, Cümhuriyyətin 1918-ci ildə imzaladığı İstiqlal Bəyannaməsinin və onun ideallarının 100 ildən sonra gerçəkləşməsidir”, - deyə deputat vurğulayıb.
Onun sözlərinə görə, Azərbaycan Xalq Cümhuriyyətinin tariximizdəki rolu təkcə keçmişə aid deyil, bu, eyni zamanda, gələcəyimizə işıq tutan bir dəyərdir. Bu gün Azərbaycan gəncliyi tarixini, dövlətçiliyini, milli kimliyini daha dərindən öyrənir, Vətənə, bayrağa və dövlətə olan bağlılığını artırır. Vətən müharibəsində canını fəda edən qəhrəmanlarımız bu dəyərlərin daşıyıcısı idilər.
“Biz bu gün daha güclüyük. Müstəqil siyasət yürüdən, qlobal çağırışlara çevik reaksiya verə bilən, iqtisadi və siyasi baxımdan müstəqil bir Azərbaycan var. Bu, həm Cümhuriyyətin ideyalarına, həm də Ümummilli Liderin siyasi xəttinə sadiqliyin nəticəsidir”, - deyən V.İskəndərov fikirlərini yekunlaşdırıb.
Bölmənin digər xəbərləri
