Bu gün Azərbaycanda İnşaatçılar Günüdür
Bakı, 10 aprel, AZƏRTAC
Artıq 15 ildir aprelin 10-u Azərbaycanda İnşaatçılar Günü kimi qeyd olunur.
AZƏRTAC xəbər verir ki, Azərbaycan Prezidenti İlham Əliyevin 2009-cu il 16 dekabr tarixli Sərəncamı ilə inşaatçılar hər il aprelin 10-unu peşə bayramı kimi qeyd edirlər.
Azərbaycanda inşaatın və memarlığın zəngin tarixə malik olması, XIX əsrin sonu - XX əsrin əvvəllərində ölkədə başlayan tikinti işlərinin geniş vüsət alması, həmin dövrdə tikilən və bu gün də memarlıq abidələri kimi qorunan yaşayış binaları, hazırda özündə Şərq və Qərb memarlığının nadir nümunələrini birləşdirən, dünyanın ən gözəl şəhərlərindən biri olan paytaxt Bakını çətin və şərəfli əməyin bariz nümunəsinə çevirib.
Bu gün inşaatçılar peşə bayramlarını azad, tam suveren və bütöv Azərbaycanın hər guşəsində fəxrlə qeyd edirlər. Azərbaycanın şanlı Ordusunun düşmənlə mübarizədə qazandığı Zəfərdən sonra Prezident İlham Əliyevin göstərişi ilə Qarabağ və Şərqi Zəngəzur hazırda başdan-başa nəhəng tikinti-abadlıq və quruculuq meydanına çevrilib.
Bakı şəhərinin Baş planı - 2040
Uzun müddət davam edən müzakirələr, yerli və xarici ekspertlərlə keçirilən görüş və müzakirələrdən sonra ötən il Bakı şəhərinin Baş planı təsdiq olundu. Baş Plan paytaxtın 212,3 min hektarlıq bütün inzibati ərazisini əhatə etməklə növbəti 20 il ərzində şəhərin əsas inkişaf prioritetlərini özündə əks etdirir. O cümlədən güclü və dayanıqlı inkişafı təmin edəcək mütəşəkkil çoxmərkəzli şəhər, ərazilərdən kompleks istifadə nəticəsində formalaşan dayanıqlı şəhər mühiti, mədəni və tarix-memarlıq irsinin qorunması, ərazi zonalaşdırılması, əsaslı tikinti, nəqliyyat və sosial infrastrukturlar, kommunal sistemlər, ətraf mühitin təmizlənməsi və ərazilərin abadlaşdırılması tədbirləri, habelə postsənaye dövrünə keçidi təmin edəcək yeni şəhər iqtisadiyyatı məsələlərini özündə ehtiva edir.
Baş planın əsas prioritetləri isə aşağıdakılardır:
- Şəhərin dayanıqlı inkişafı
- Şəhər və ətraf mühitin regenerasiyası
- Şəhərin memarlıq siması və tarixi irsə qayğı
- Yeni məzmun
Prezident İlham Əliyevin Azərbaycana rəhbərliyi dövrünü nəhəng tikinti və quruculuq illəri kimi də xarakterizə etmək olar. Bu illər ərzində inşaatçıların, memarların və layihəçilərin gərgin əməyi sayəsində müasir avadanlıqla təchiz olunmuş onlarla diaqnostika mərkəzi və digər səhiyyə obyektləri, dünya və Avropa standartlarına tam cavab verən Olimpiya İdman kompleksləri, yüzlərlə çoxmərtəbəli yaşayış binası, həmçinin yol qovşaqları, avtomobil körpüləri və yol ötürücüləri, piyada keçidləri tikilib istifadəyə verilib. Aşağıda göstərilən rəqəmlər görülən işlərin sübutudur.
Tikinti sektorunda görülən işlər rəqəmlərdə
Azərbaycanda tikinti materiallarının istehsalı sahəsində cari ildə istehsalın ümumi dəyəri 173,9 milyon manat olub ki, bu da ötən illə müqayisədə 35,1 faiz artım deməkdir. Beton istehsalı 59,7 faiz, betondan yığma tikinti konstruksiyalarının istehsalı 50,0 faiz, sement istehsalı 29,8 faiz, tikinti gipsinin istehsalı isə 23,1 faiz artıb.
Bundan başqa, bu il ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala illə müqayisədə 15,5 faiz çox investisiya yönəldilib ki, bunun da 5,1 faizi yaşayış evlərinin tikintisinin payına düşüb. Sərmayə qoyuluşunun isə 72,8 faizi tikinti-quraşdırma işlərinə sərf edilib. Həmçinin cari ildə tikinti müəssisələri tərəfindən (fərdi sahibkarlar nəzərə alınmaqla) yerinə yetirilmiş inşaat işlərinin 79,4 faizini tikinti, yenidənqurma və genişləndirmə, 8,4 faizini əsaslı təmir, 6,2 faizini cari təmir, 6 faizini isə sair tikinti işləri təşkil edib. Ümumi inşaat işlərinin 85,5 faizini qeyri-dövlət tikinti müəssisələri yerinə yetiriblər.
Onu da bildirək ki, rəqəmlər hər ötən müddət yüksələn xətlə davam edir. Bu da ölkədaxili siyasətdə tikinti, quruculuq, abadlıq işlərinə dövlətin ayırdığı diqqət və qayğının təzahürüdür.
Bölmənin digər xəbərləri
