Cəlilabadda heyvandarlığın cins tərkibi yaxşılaşdırılır – fermerlər süni mayalandırmaya maraq göstərirlər VİDEO
Cəlilabad, 7 fevral, İsmayıl Cəfərli, AZƏRTAC
Cəlilabadlı fermerlər yerli şəraitə davamlı heyvan cinslərinin artırılması üçün təsərrüfatlarda inəklərin yüksək məhsuldar törədici toxumlarla süni mayalandırılmasına önəm verirlər. Ötən il fermer təsərrüffatlarında süni mayalanma ilə alınan 3 min 527 baş cins tərkibli buzovun 13-ü əkiz doğulub.
AZƏRTAC xəbər verir ki, Üçtəpə kəndində uzun illərdir təsərrüfatla məşğul olan Səfər Əhədov da heyvanlarını süni mayalandırır. O, həm də kənddə süni mayalanma üzrə mütəxəssis kimi fəaliyyət göstərir. Deyir ki, yerli heyvanların çəkisi 2 ilə 120-150 kiloqrama çatırsa, süni mayalanmadan doğulan cins buzovlar 9 aya 200-250 kiloqram olur. Ona görə də, təsərrüfatında süni mayalanma ilə alınan heyvanların sayını artırır.
Heyvanların süni mayalandırılması həm qısırlığı azaldır, həm də balavermə faizini artırır. Bundan başqa, süni mayalandırma ilə əldə edilən heyvanlardan daha çox ət və süd götürmək olur.
Hazırda Səfər Əhədovun təsərrüfatında “Simmental” və “Holşteyn-friz” cinsli heyvanlar çoxluq təşkil edir. Onun sözlərinə görə, həmin heyvanlar günə orta hesabla 25 litr süd verir.
Cəlilabad Dövlət Aqrar İnkişaf Mərkəzinin heyvandarlıq sektorunun müdiri Cavanşir Həsənov da süni mayalanmanın əhəmiyyətindən danışır. Bildirir ki, rayonda yüksək məhsuldar cins heyvanların saxlanmasına, artırılmasına böyük maraq var: “Burada dövlətimizin dəstəyinin də böyük əhəmiyyətini vurğulamaq lazımdır, bu iş üçün subsidiya verilir. Bu yaxınlarda qərar qəbul olundu ki, camış balalarına da subsidiya veriləcək. Ona görə də, əhali heyvanların süni mayalandırılmasına maraq göstərir”.
Heyvandarlığın cins tərkibinin yaxşılaşdırılması məqsədilə artıq ölkəmizdə süni mayalanma mərkəzində ən müasir texnologiyanın tətbiqi ilə yeni cinslərin və embriondan alınan törədici toxumların istehsalına da başlanılıb. Bu isə yaxın gələcəkdə bölgələrdəki heyvandarlıq təsərrüfatlarında daha məhsuldar cinslərin əldə olunmasına böyük töhfə verəcək.
Cəlilabad Dövlət Aqrar İnkişaf Mərkəzindən verilən məlumata görə, ötən təsərrüfat ilində rayonda 14 min 494 ton ət, 71 min 731 ton süd istehsal olunub. İribuynuzlu heyvanların baş sayı 91 min 130-a çatıb. Ümumilikdə son beş ildə süni mayalanmadan 16 min 969 baş bala alınıb.
Bölmənin digər xəbərləri
