Cəlilabadda ümumxalq hüzn günü ilə əlaqədar mərasim keçirilmişdir
Cəlilabad, 21 yanvar (AZƏRTAC). Yanvarın 20-də Cəlilabad şəhərindəki Şəhidlər xiyabanında Qanlı 20 Yanvar faciəsinin iyirmi birinci ildönümünə həsr olunmuş mərasim keçirilmişdir.
AZƏRTAC xəbər verir ki, tədbir iştirakçıları ölkəmizin suverenliyi və ərazi bütövlüyü uğrunda şəhid olanların şərəfinə ucaldılan abədənin önünə gül dəstələri düzmüş, istiqlal mücahidlərinin xatirəsini ehtiramla yad etmişlər. Burada şəhidlərin ruhuna dualar oxunmuşdur.
Toplantıda çıxış edən Cəlilabad Rayon İcra Hakimiyyətinin başçısı Əziz Əzizov 20 Yanvar faciəsinin tariximizin həm qanlı, həm də qəhrəmanlıq səhifəsinin olduğunu vurğulamış, xalqımızın azadlığı, ölkəmizin ərazi bütövlüyü uğrunda şəhid olanların ailələrinə Prezident İlham Əliyev tərəfindən daim qayğı göstərildiyini diqqətə çatdırmışdır.
Tədbir Cəlilabad şəhərindəki “Tut bağı” istirahət mərkəzində davam etmişdir. Burada 20 Yanvar şəhidlərinin şərəfinə ehsanlar verilmiş, şəhid ailələrinə, əlillərə və müharibə iştirakçılarına maddi yardımlar edilmişdir.
Rayonun bədii ozfəaliyyət kollektivlərinin ifasında Qanlı 20 Yanvar faciəsinin dəhşətlərini əks etdirən ədəbi-bədii kompozisiya nümayiş etdirilmişdir.
Bölmənin digər xəbərləri
