CƏNUBİ QAFQAZ MÜNAQİŞƏLƏRİNƏ HƏSR OLUNMUŞ FİLMLƏRİN TƏQDİMATI
İki gün ərzində keçirilən kinoseanslar Henrix Bell Fondu və Britaniyanın “Barışıq ehtiyatları” təşkilatı tərəfindən təşkil edilmişdir.
H.Bell Fondunun Moskvadakı nümayəndəliyinin başçısı Yens Zigertin sözlərinə görə, filmlər Azərbaycan, Gürcüstan, Ermənistan, habelə London, Berlin və Frankfurt-Maynda nümayiş olunmuşdur. O demişdir: “Biz bu filmləri Türkiyədə də göstərmək niyyətindəyik. Münaqişə tərəflərinin arasındakı anlaşılmazlığı yüngülləşdirmək və gələcək barışıq üçün problemi başqa gözlə, başqa baxımdan göstərmək istəyirik”. Gürcüstanın “Re studiya” Assosiasiyası rejissor Mamuka Kuparadzenin “Abxaziya münaqişə tərəfidir” və həmin studiyanın rəhbəri Mixail Mirziaşvilinin 2004-cü ildə çəkdiyi “Qarabağ” filmlərini təqdim etmişdir. Sonuncunun üzərində Mamuka Kuparadze və Svetlana Korzaya da işləmişlər.
Təqdimatda nümayiş olunan bütün sənədli filmlər sadə adamların onların torpağında baş verən münaqişələrin həlli üsulları barədə nə düşündüklərindən söhbət açır. Filmlərdə qondarma dövlətlərin sakinlərinin, münaqişə zonaları qaçqınlarının, hərbi əməliyyatların keçmiş iştirakçılarının, qeyri-hökumət təşkilatları nümayəndələrinin hadisələrə münasibəti verilmişdir.
Rejissor Mixail Mirziaşvilinin sözlərinə görə, kinoqrup qanlı-qadalı Ermənistan-Azərbaycan münaqişəsi barədə film çəkərkən qonşu ölkə sakinlərinin bu münaqişəyə münasibətini göstərmək istəmişdir. Rejissorun fikrincə, münaqişələr dincliklə həll edilməlidir.
Filmlərin nümayişindən sonra münaqişə bölgələrinin keçmiş sakinlərinin iştirakı ilə diskussiya təşkil edilmiş, burada müxtəlif fikirlər səslənmişdir. Lakin hamı bir məsələdə yekdil olmuşdur: onların vətəninə sülh gərəkdir.
Bölmənin digər xəbərləri
