Çin ilə CELAC ölkələri arasında ticarət dövriyyəsi 500 milyard dolları ötüb
Pekin, 13 may, AZƏRTAC
Ötən il Çin ilə Latın Amerikası və Karib hövzəsi ölkələri arasında ticarət dövriyyəsinin həcmi 500 milyard dolları ötüb.
AZƏRTAC xəbər verir ki, bunu Çin Xalq Respublikasının (ÇXR) Sədri Si Cinpin Pekində keçirilən Çin-CELAC (Latın Amerikası və Karib Hövzəsi Dövlətləri İcması) forumunun 4-cü nazirlər iclasının açılışında deyib.
ÇXR Sədri bu rəqəmin 2000-ci illərin əvvəli ilə müqayisədə 40 dəfədən çox olduğunu bildirib. Çin lideri ölkəsinin CELAC ilə həmrəyliyi gücləndirmək niyyətində olduğunu, bir-birini əsas maraqları ilə bağlı məsələlərdə dəstəkləməyə davam edəcəyini deyib.
Qeyd edək ki, Çin-CELAC forumu 2015-ci ildə təsis edilib. Bu platforma Çin ilə Latın Amerikası və Karib hövzəsi ölkələri arasında müxtəlif sahələrdə əməkdaşlığın dərinləşməsinə dəstək məqsədi daşıyır. Bu kontekstdə Çin 2017-ci ildə Panama, 2018-ci ildə Dominikan Respublikası, 2018-ci ildə El-Salvador, 2023-cü ildə Honduras ilə diplomatik əlaqələr qurub, 2021-ci ildə Nikaraqua ilə diplomatik əlaqələri bərpa edib. Pekin 16 CELAC ölkəsi ilə müxtəlif növ tərəfdaşlıq, o cümlədən strateji tərəfdaşlıq qurub. 2012-ci ildən Latın Amerikası və Karib Hövzəsinin 2-ci ən böyük ticarət tərəfdaşına çevrilən Çin hazırda Braziliya, Çili və Perunun əsas ticarət tərəfdaşıdır. Ötən il Çin ilə CELAC arasında ticarət dövriyyəsinin ümumi məbləği 518,4 milyard dollar olub.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
